“Barselona”nın hücumçusu Robert Levandovski İspaniya La Liqasının 28-ci turunda “Atletiko”ya qarşı keçirdikləri oyunu şərh edib.
Arena.az xəbər verir ki, polyak futbolçu paytaxt təmsilçisi üzərində 4:2 hesablı əzmkar səfər qələbəsindən sonra yuxusuzluğa mübtəla oldğunu bildirib:
“Düzü, belə bir oyundan sonra mən pis yatmışam. Biz Barselonaya gecə saat 3-də çatdıq, evə gələndə isə mən adi qaydasınca yata bilmədim”, deyə Levandovski etiraf edib.
“Barselona”nın 17 yaşlı ispaniyalı sağ cinah hücumçusu Lamin Yamal da “Atletiko” üzərindəki qələbəni şərh edib:
“Mən çox, çox şadam. Bu, vacib oyun idi. Ən əsası isə – biz qələbə qazandıq”, deyə Yamal vurğulayıb.
Xatırladaq ki, “döşəkçilər” bu oyunda 2:0 hesablı üstünlüyü əldən verərək məğlub olublar.
Yeri gəlmişkən, Madrid “Atletiko”sunun baş məşqçisi Dieqo Simeone “Barselona” haqda qənaətini bir daha açıqlayıb. Argentinalı mütəxəssisin bu barədə fikrini təqdim edirik:
“Mən bunu daha əvvəl də demişəm və bir daha təkrarlaya bilərəm: “Barselona” hazırda ən yaxşı futbolu oynayan komandadır”, deyə “EL-Çolo” ləqəbli Simeone vurğulayıb.
Hazırda 60 xala malik “Barselona” La Liqanın yarış cədvəlinə başçılq edir. Madrid “Real”ı da 60 xalı olmasına rəğmən, 2-ci pillədə qərarlaşıb. Amma Kataloniya təmsilçisinin ehtiyatda daha bir oyunu var. “Atletiko” isə 56 xalla 3-cüdür.
