Tələbə şəhid övladları Türkiyədə aerokosmik innovasiyalar üzrə təcrübə mübadiləsi proqramında iştirak ediblər.
QHT.az xəbər verir ki, 14-19 mart 2025-ci il tarixlərində Azərkosmosun KOSMİK Akademiyasının təşkilatçılığı, GUHEM-Gökmen Uzay ve Havacılık Merkezinin dəstəyi ilə Azərbaycan universitetlərinin tələbələri üçün Türkiyənin Bursa şəhərində yerləşən Gökmən Kosmik və Aviasiya Təhsil Mərkəzinə (GUHEM), Ankara şəhərində yerləşən Türkiyə Aerokosmik Agentliyi, TürkSat şirkəti, Roketsan şirkəti, Delta V, Orta Doğu Texniki Universiteti, İstanbul şəhərində yerləşən Baykar Teknoloji (Bayraktar qrup) şirkəti, Yıldız Texniki Universiteti və texnoparkında nəzəri və praktiki təcrübə mübadiləsi təşkil olunub.
"Zəfər" Şəhid Ailələrinə Dəstək İctimai Birliyinin dəstəyi ilə bu təcrübə mübadiləsi proqramında 3 tələbə şəhid övladı - polkovnik Babək Səmidlinin oğlu Mətləb Səmidli, baş gizir Yasən Əhmədovun oğlu Yelmar Əhmədli və gizir Rahim Tağıyevin oğlu Nihad Tağızadə də iştirak edərək kosmos, aerokosmos, aviasiya, innovasiyalar, texniki elmlər, süni intellekt və mühəndislik sahələri üzrə nəzəri və praktiki biliklər əldə ediblər.
Qeyd edək ki, layihənin əsas məqsədi Azərbaycanda gənclərin kosmos, aerokosmos, süni intellekt və aviasiya istiqamətləri də daxil olmaqla, digər texnoloji sahələrdə biliklərini artırmaq, həmçinin beynəlxalq təcrübə mübadiləsini keçirərək, onların sözügedən sahələrdə gələcəyin güclü mütəxəssisləri kimi inkişaf etmələrinə dəstək olmaq, bununla da Azərbaycanda peşəkar kadrların və insan kapitalının inkişafına dəstək göstərmək, ölkəmizin regional və qlobal miqyasda sahə üzrə inkişafına dəstək verməkdən ibarət olub.
