“Barselona”nın ulduz hücumçusu Robert Levandovski İspaniya La Liqasında hakimlərin çirkin oyuna imkan verdiklərini düşünür.
Arena.az polyak futbolçunun müvafiq qənaətini təqdim edir:
“Mən başa düşürəm ki, komandalar hər hansı surətdə bizə mane olmağa çalışırlar, amma bəzən hakimlər də buna yol verirlər. Bizə həmişə deyirlər ki, çərçivələr var, amma özləri bunları qəribə surətdə istifadə edirlər, ona görə də sən bu çərçivələrin harada olduğunu sona qədər anlaya bilməzsən.
Fikrimcə, hakimlər daha hücumameyilli futbolu təşviq etməlidirlər. Bəzən hakimlər sərt oyundan daha çox çirkin oyuna imkan verirlər. Əgər kimsə sərt oynayırsa, bu, qəbulediləndir, yox əgər səndən yapışır, yerə sərirlərsə, bu, məncə, daha həddindən artıqdır”, deyə “Lyova” vurğulayıb.
Robert Levandovski “Barselona”ya 2022-ci ilin iyul ayında 45 milyon avro məbləğ müqabilində “Bayern”dən keçib. Tərəflər arasındakı müqavilə daha 1 il müddətinə uzadılması imkanı ilə 2026-cı il iyun ayının sonuna qədər qüvvədədir.
Polyak hücumçu cari mövsümdə “Barselona”nın heyətində 40 oyuna çıxıb, 35 qol vurub və 3 məhsuldar ötürmə verib.
Levandovskinin Kataloniya klubu üçün çıxışı ümumilikdə 135 oyun, 94 qol və 20 məhsuldar ötürmədən ibarətdir.
Təcrübəli hücumçu karyerası ərzində “Borussiya” (Dortmund), “Lex” (Poznan), “Zniç”, “Legiya” (Varşava) və “Delta” komandalarında da çıxış edib.
Robert Levandovski hazırda kapitanı olduğu və 2008-ci ilin sentyabr ayında debüt etdiyi Polşa yığmasının heyətində 156 oyun keçirib, 84 qol vurub, 35 məhsuldar ötürmə verib. Robert hər iki göstərici üzrə Polşa yığma komandasının mütləq rekordçusudur.
“Transfermarkt” internet-portalı 36 yaşlı polyak hücumçunun transfer dəyərini 15 milyon avro məbləğində qiymətləndirir.
