Pəhrizinizə meyvə, tərəvəz, badam, tam taxıl və sağlam yağlar əlavə etməklə ürək sağlamlığınızı gücləndirə bilərsiniz. Dərmanlarınızı diqqətlə izləyin, aktiv qalın, yuxuya üstünlük verin, müntəzəm müayinələr planlaşdırın və stressi idarə edin.
E-saglam.az xəbər verir ki, məşhur fitnes məşqçisi Yasmin Karaçivala ürək sağlamlığı üçün praktiki məsləhətləri bölüşür. Hər hansı bir dəyişiklik etməzdən əvvəl həkiminizlə məsləhətləşin.
Ürək sağlamlığını qorumaq çətin görünə bilər, lakin həyat tərzinizdə və pəhrizinizdə düzgün dəyişikliklər etməklə bunu asanlıqla bacara bilərsiniz. Ürək-sağlam həyat yaşamaq təkcə qidalanma ilə deyil, həm də ümumi həyat tərzinizlə bağlıdır.
1. Düzgün qidalanma
Ürək sağlamlığının əsası balanslaşdırılmış qidalanmadır.
– Meyvə və tərəvəzlər: Mövsümi və rəngarəng tərəvəzlərdən istifadə edin. Onlar ürəyinizi qorumağa kömək edən vitaminlər, minerallar və antioksidantlarla zəngindir.
– Badam istehlak edin: Gündə bir ovuc badam pis xolesterolu (LDL) azaltmağa və iltihabı minimuma endirməyə kömək edir. Bundan əlavə, badam qarın yağını və bel ölçüsünü azaltmağa da müsbət təsir göstərə bilər.
– Tam taxıllar seçin: Qəhvəyi düyü, quinoa və tam buğda çörəyi kimi təbii taxıllar qan şəkərini tarazlaşdırmağa kömək edir.
– Sağlam yağlara üstünlük verin: Zeytun yağı, avokado və qoz-fındıq kimi sağlam yağlar LDL xolesterolu aşağı salır və ürək xəstəliyi riskini azaldır.
– Duz istehlakını məhdudlaşdırın: Həddindən artıq duz yüksək qan təzyiqi riskini artırır. İşlənmiş qidalardan uzaq durmaq və çöldə yeməyi məhdudlaşdırmaq vacibdir.
– Zülal mənbələrini düzgün seçin: Qırmızı ət əvəzinə toyuq, balıq və paxlalılar kimi protein mənbələri daha sağlam seçimdir.
2. Dərmanlardan düzgün istifadə edin
Əgər ürək dərmanları qəbul edirsinizsə, həkiminizin göstərişlərinə tam əməl etmək vacibdir. Dozaları atlamayın və hər hansı bir yan təsir hiss edirsinizsə, mütləq həkiminizlə məsləhətləşin.
3. Aktiv qalın
İdman ürək sağlamlığını qorumağın ən təsirli yollarından biridir. Daimi fiziki fəaliyyət sağlam çəkinin qorunmasına, qan dövranının yaxşılaşmasına və qan təzyiqinin normallaşmasına kömək edir. Həftədə ən azı 150 dəqiqə orta intensivlikdə məşq (gəzinti, velosiped sürmə) və ya 75 dəqiqə yüksək intensivlikli məşq (qaçış, üzgüçülük) tövsiyə edilir.
4. Keyfiyyətli yuxu
Yuxu sağlam ürək üçün qidalanma və idman qədər vacibdir. Hər gecə 7-9 saat dinc yuxu almağa çalışın. Zəif yuxu vərdişləri ürək xəstəlikləri riskini artırır, buna görə də yuxu rejiminizə diqqət edin.
Tərcümə: Könül Oruc
