"Bu gün ölkəmizə Şərq təqvimi ilə yeni il gəldi. Novruz yeni gün, yeni ruzi, yeni arzu deməkdir".
"Cebheinfo.az" xəbər verir ki, bu sözləri Milli Məclisin deputatı Jalə Əliyeva deyib. O, Novruz bayramı ilə bağlı Ulu Öndər Heydər Əliyevin çıxışını xatırladıb:
"Bu müqəddəs gündə Azərbaycan xalqının böyük oğlu, Ulu Öndər Heydər Əliyevin bundan tam 29 il əvvəl - 21 mart 1996-cı ildə Novruz şənliyindəki çıxışından ölməz kəlmələri xatırlayaq: “Biz torpaqlarımızın azadlığını, ərazi bütövlüyümüzü təmin edəcəyik, müstəqil Azərbaycanın hüdudlarını bərpa edəcəyik.” Azərbaycan Respublikasının Prezidenti, Müzəffər Ali Baş Komandan İlham Əliyev Ümummilli Liderin vəsiyyətini və Azərbaycan xalqının arzularını reallaşdırdı.
Ali Baş Komandanın rəhbərliyi altında müzəffər Azərbaycan Ordusu doğma torpaqlarımızı işğaldan azad etdi və biz artıq həmin ərazilərdə Novruz bayramını qeyd edirik. Bundan beş il əvvəl, böyük Zəfərimizdən sonra gələn ilk Novruzumuzda - 20 mart 2021-ci il tarixində Prezident İlham Əliyev Şuşadan bütün dünya azərbaycanlılarına səsləndi, bayramımızı Qarabağımızın vuran ürəyi Şuşa ilə birlikdə qeyd etdik".
Millət vəkili vurğulayıb ki, artıq 5 ildir Novruz bayramını Zəfər çalmış, bütöv və suveren bir ölkə kimi qarşılayırıq: "Artıq beşinci dəfədir ki, ölkə və xalq olaraq cənab Prezidenti İlham Əliyev və birinci xanım, Birinci vitse-Prezident Mehriban Əliyeva, ailə üzvləri ilə birlikdə Novruz bayramını ardıcıl olaraq 2021-ci ildə Şuşada, 2022-ci ildə Suqovuşanda, 2023-cü ildə Talışda, 2024-cü ildə Xankəndində, bu il isə Ağdərədə qarşılayırıq! Beşinci dəfədir ki, bayram tonqalı azad edilmiş Qarabağ torpağında qalanır! Bu gün biz azad edilmiş Qarabağda başımızı dik tutaraq yaşayırıq.
Keçmiş köçkünlər öz doğma yurd-yuvalarına - Laçına. Füzuliyə, Xankəndiyə, Xocalıya, Şuşaya, Cəbrayıla, Kəlbəcərə, Zəngilana qayıdırlar. Prezident İlham Əliyevin də söylədiyi kimi, "biz özümüz ədaləti bərpa etdik, torpaqlarımızı işğalçılardan azad etdik, öz gücümüzü göstərdik və bundan sonra hər kəs bizimlə hesablaşmalıdır, əks təqdirdə, özü peşman olacaq"". Deputat bildirib ki, Novruz həm də barışıq, dostluq və qardaşlıq deməkdir: "Yenə də Ulu Öndərin kəlmələrini xatırlayaq:
“Novruz bayramının bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır. Bu bayram bir də onunla fərqlənir və səciyyələnir ki, bu bayramda siyasi baxışlarından, siyasi dünyagörüşündən asılı olmayaraq hamı bayram edir.
Əgər bu günümüzü götürsək, iqtidar da, müxalifət də bayram edir, bir-birini sevən də bayram edir, bir-birinə düşmən olan da. Amma bayramın bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır. Ona görə də Novruz bayramını hər il böyük el bayramı kimi, hər bir insanın şəxsi bayramı kimi qeyd edərək biz istəyirik, arzu edirik və bu, Azərbaycan vətəndaşlarının əksəriyyətinin arzusudur ki, ölkəmizdə milli həmrəylik, vətəndaş həmrəyliyi, birliyi olsun.
Bu ali məqsədləri, ali fikirləri ulu babalarımız bizə nəsihət ediblər. Bu bayram yaranandan onun xüsusiyyətləri insanları həmişə dostluğa, həmrəyliyə, qarşılıqlı anlaşmaya dəvət edibdir”. Xalqımızın bu sülhpərvər missiyasını ləyaqətlə bütün dünyada tanıdan, milli adət-ənələrimizi, tariximizi, mədəniyyətimizi, musiqimizi yaşadan və qoruyan Heydər Əliyev Fondu, bu Fondun rəhbəri, birinci xanım, Birinci vitse-prezident Mehriban Əliyevanın təşəbbüsləri ilə Novruz bayramı da digər milli dəyərlərimiz kimi uğurla beynəlxalq müstəviyə çıxarılmaqdadır. Məhz Mehriban xanım Əliyevanın böyük səyi nəticəsində Novruz bayramı UNESCO-nun Qeyri-Maddi Mədəni İrs üzrə Reprezentativ siyahısına daxil edilib".
Jalə Əliyeva diqqətə çatdırıb ki, ölkəmiz artıq uzun illərdən bəri bu əziz bayramı sülh, əmin-amanlıq, barışıq, firavanlıq içərisində qeyd edir: "Bu gün azadıq, müstəqillik, bütövlük, suverenliyimizi bərpa etmişik! Bu, bir ölkənin var olması, xalqın xoşbəxt gələcəyi üçün böyük bir nemətdir, sonsuz bir xoşbəxtlikdir! Tanrı bu böyük neməti və sonsuz xoşbəxtliyi bizə nəsib edən Müzəffər Prezidentimizi, Şanlı Ordumuzu qorusun! Bu bayram günündə bütün qəhrəman şəhidlərimizi bir daha rəhmətlə anır, bütün ölkəmizə bayram əhval-ruhiyyəli illər arzulayırıq! Suveren Azərbaycanım, Novruzun mübarək!"
"Cebheinfo.az"
