Allah var, bilirəm...

"Ədəbi düşüncələr" rubrikasında şair Əli Hacı Ağaevlinin şeirlərini zaman-zaman oxuculara təqdim edəcəyik. Şairin sosial şəbəkələrdə böyük maraqla qarşılanan şeirləri müxtəlif illərdə yazılmış ədəbi nümunələrdir. Asan həzm olunan, dərin məna ehtiva edən bu şeirlər Əli Hacının mə­nəvi – ruhani dünyasının poetik ifadəsidir.

* * *

Allah var, bilirəm
hamı qaçır ona sarı!
Günü, ayı,
zamanı qabağında otarır Tanrı!

Rənginə görə məhsul verir torpaqları,
Daşıdığı yükünə bənzəyir adamları!
Yerin üstündədir,
göyün qanadları!
Yerin üzünə yanır Günəş,
rəngi-sarı !

Allah var, bilirəm
kökü ağacı,
budağı yarpağı oxşayan kimi!
Barmağımın izləri,
təkliyin yaşayan kimi!

* * *

Sən getmisən, çıxıb gedib
Sevinc, səbir, bir də dözüm!
Səni yerdə itirmişəm,
Ölüb, səni göydə gəzim?!

Əl-yastığım, daş-döşəməm
Gəl, indi sənsiz üşümə!
Can dağılıb, ələ düşmə...
Evə gəlmir iki gözüm!

Yağış-suyum, güman-çətrim
Yaşamağın itib ətri!
Bəndləşsədə hər bir sətrim,
Sənlə bitir hər bir sözüm!

* * *

Bu yerdən bir səs gəldi,
Gəldim, olumdu deyə!
Haqq deyib əzab çəkdim,
Sevdim, yolumdu deyə!

Olmağım öz təbində,
Yaşadım söz təbində!
Eşqimin köz təbində,
Qaldım, yar umdum deyə!

Qalan elə şəkildi,
Qəm, şəklim yekə çəkdi!
Cütlüyü təkə çəkdi,
Güldüm, ölümdü deyə!


Xəbər 1694 dəfə oxunub.