Rusiya prezidentinin mətbuat katibi Dmitri Peskov ABŞ prezidenti Donald Trampın Ukrayna münaqişəsinin həllinə dair sazişin konturlarının artıq müəyyən edildiyi barədə sözlərini şərh edib.
NOCOMMENT.az xəbər verir ki, bu barədə Kremlin sözçüsü brifinq zamanı jurnalistlərə bildirib.
“Görünür, söhbət ölkələrin sülh yolu ilə nizamlanma yolu ilə hərəkət etmək istəyi və hazırlığından gedir. Burda həqiqətən ortaq anlaşma var”, – deyə o vurğulayıb.
O qeyd edib ki, martın 24-də Ər-Riyadda Rusiya və Amerika nümayəndə heyətləri arasında texniki məsələlərin müəyyən hissəsi üzrə danışıqlar aparılır. Müzakirə həmçinin Qara dəniz sazişinin mümkün bərpasına da aiddir.
Peskov əlavə edib ki, ümumiyyətlə, Ukraynada nizamlanma ilə bağlı hələ də işlənilməsi lazım olan çoxlu müxtəlif aspektlər var.
Martın 21-də ABŞ prezidenti Donald Tramp bildirib ki, onun rusiyalı və ukraynalı həmkarları Vladimir Putin və Vladimir Zelenski ilə təmaslarından sonra Ukrayna ilə bağlı gələcək razılaşmanın konturları artıq ortaya çıxıb.
“Düşünürəm ki, artıq müqavilənin konturları var. Ümid edirəm ki, bizdə razılaşmanın konturları var”, – deyə Amerika lideri Ağ Evdə jurnalistlərə bildirib.
