Rusiya və ABŞ nümayəndələri Ukraynadakı münaqişənin həlli üçün Ər-Riyadda danışıqlara başlayıblar.

Reyting.az bildirir ki, bu barədə TASS-a Rusiya nümayəndə heyətinə yaxın mənbə məlumat verib.

Məlumata görə, Rusiya nümayəndə heyəti bundan əvvəl “The Ritz-Carlton” otelinə gəlib.

Səudiyyə Ərəbistanı Dövlət Təhlükəsizliyi Xidmətinin əməkdaşları jurnalistlərdən otelin ərazisini tərk etməyi xahiş ediblər.

Onu da qeyd edək ki, nümayəndə heyətlərinin görüşü qapalı keçirilir.

***

Rusiya prezidentinin köməkçisi Yuri Uşakov deyib ki, məsləhətləşmələrin mövzusu Qara dəniz taxıl təşəbbüsünün bərpası olacaq. Belə razılaşmalar Rusiya və ABŞ prezidentləri Vladimir Putin və Donald Tramp arasında telefon danışığı zamanı əldə edilib.

ABŞ prezidentinin milli təhlükəsizlik üzrə müşaviri isə bildirib ki, nümayəndə heyətləri Qara dənizdə hərbi əməliyyatların dayandırılması məsələsinə diqqət yetirəcəklər. O qeyd edib ki, danışıqların növbəti mərhələsində Rusiya və ABŞ atəşkəs rejiminin yoxlanılması, sülhməramlı kontingent, ərazilərin mülkiyyəti ilə bağlı məsələləri müzakirə edəcəklər.

E. KAMAL

• Rusiya
• Ukrayna
• Münaqişə
• Danışıqlar