Amerika prezidenti Donald Trampın təhdidləri və təzyiqləri səbəbindən birbaşa dialoq imkanı olmadığı halda İran ABŞ-la dolayı danışıqlara hazırdır.
NOCOMMENT.az xəbər verir ki, bunu İranın xarici işlər naziri Abbas Əraqçi deyib.
“Bu məsələ ilə bağlı mövqeyimiz tamamilə aydındır. <…> Hər gün səslənən siyasət və ittihamları nəzərə alsaq, biz Amerika tərəfi ilə birbaşa danışıqlara girməyəcəyik, lakin dolayı danışıqlara yol açıqdır”, – deyə İranın xarici işlər naziri bildirib.
Bundan əvvəl “Axios” portalı ABŞ prezidenti Donald Trampın İranın nüvə proqramı ilə bağlı yeni saziş bağlamaq üçün İrana iki ay vaxt verdiyi barədə məlumat vermişdi. Ağ Ev rəhbərinin İranın ali dini lideri Əli Xamneyiyə müvafiq məktub göndərdiyi iddia edilir.
