Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova deyir ki, "Boşanmaların səbəbkarı qadınlardır".
Bəs görəsən qadın sevdiyi adamdan niyə boşanmaq istəsin? Qadınları bu addımı atmağa nə vadar edir? Həqiqətənmi qadın aliment almaq, sərbəstlik əldə etmək, rahat yaşamaq üçün boşanır?
Mövzu ilə bağlı Vəkillər Kollegsiyanın üzvü, vəkil Rəşad Əliyev Moderator.az-a danışdı.
"Həm vəkil, həm də mediator olaraq deyə bilərəm ki, bizə daxil olan müraciətlərdə nikahların pozulması ilə bağlı məsələlərdə boşanmaların ən müxtəlif səbəbləri ilə rastlaşmaq mümkündür. Azərbaycan qanunvericiliyində nikahın pozulması üçün müraciət etməyə hər hansı xüsusi halın baş verməsi tələbi qoyulmayıb. Tərəflərdən birinin müraciəti əsasında sadəcə "xasiyyətimiz uyğun gəlmir" ifadəsi kifayət edir ki, nikahın pozulması həyata keçirilsin. Digər tərəf bununla bağlı razılıq bildirmirsə, bu halda məhkəmə əlavə üç ay barışıq üçün vaxt verir. Üç ay ərzində tərəflər arasında razılıq əldə olunmazsa, o halda məhkəmə birmənalı şəkildə nikahın pozulmasını həyata keçirir. Ona görə də Azərbaycanda statistik olaraq boşanmaların sayı artsa da, səbəbləri, real vəziyyəti tam olaraq aydınlaşdırmaq mümkün deyil. Ancaq rastlaşdığımız işlərdə qısqanclıq səbəbindən nikahın pozulması hallarına çox rast gəlirik. Bundan başqa, ailə-məişət zorakılığı əsasında tərəflərin xasiyyətlərinin uyğun gəlməməsi, sosial-maddi vəziyyətdən dolayı tərəflər arasında yaranmış konflikt, kənar müdaxilələr, qohumların müdaxiləsi kimi məsələlər də nikahın pozulmasına gətirib çıxaran amillərdəndir. Ancaq birmənalı şəkildə əksər qadınların alimentə görə boşanmasını qeyd etmək doğru deyil".
