Hurriyyet.az "Vestnik Kavkaza" portalına istinadla xəbər verir ki, Gürcüstanda müxalifətin nümayəndələri tərəfindən zədələnmiş parlament binasının Avropa İttifaqının təmir etməli olduğu tələbi səsləndirilib.
Gürcüstan hakimiyyəti Aİ-dən müxalifətin etiraz aksiyalarının vurduğu zərər müqabilində kompensasiya ödənilməsini tələb edir.
Gürcüstan parlamentinin spikeri Şalva Papuaşvili Avropa İttifaqının hakimiyyət orqanlarını müxalifət tərəfindən zədələnmiş ölkə parlamentinin binasının bərpası üçün xərcləri ödəməyə çağırıb. Spiker deyib: "Radikalların polis əməkdaşlarına necə hücum etməsi, parlament binasını yandırmağa cəhd etməsi televiziyada canlı göstərilib, lakin avropalı diplomatlar bunun fərqinə varmayıblar. Bu, biabırçılıqdır və hər hansı bir dəyərdən məhrum olmanın göstəricisidir".
Papuaşvili zərərlə bağlı konkret rəqəmlər göstərib. Siyasətçinin sözlərinə görə, ölkənin parlament binasına 40 min dollar ziyan dəyib, lakin avadanlıqların və inventarların məhv edilməsini də nəzərə alsaq, xərclər təxminən 200 min dollar təşkil edə bilər.
Xatırladaq ki, Gürcüstanda etiraz aksiyaları ötən ilin oktyabr ayının sonlarından keçirilir. Müxalifət parlament seçkilərinin nəticələri ilə, eləcə də Avropaya inteqrasiya planlarının müvəqqəti dondurulması ilə razılaşmayıb. Ən fəal etiraz aksiyaları Gürcüstan parlamentinin binası qarşısındakı meydanda keçirilib.
Hürr Tərcüman
