"Mən Putinə inanmıram, sülh sazişi bağlandıqdan sonra o, Ukraynanı müdafiəsiz qoymaq üçün israr edəcək..."
Böyük Britaniyanın baş naziri Kir Starmer ABŞ prezidenti Donald Trampın Avropaya qarşı soyuq münasibətinə baxmayaraq, Avropa və ABŞ arasındakı əlaqələrin qorunmasının vacibliyinə inanır.
Moderator.az xəbər verir ki, bu barədə o, "The New York Times" nəşrinə verdiyi müsahibədə bəyan edib.
"Bir çoxları bizdən ABŞ və Avropa arasında seçim etməyimizi istəyir. Britaniyanın keçmiş baş naziri Uinston Çörçill bunu etməyib. Eks-baş nazir Klement Ettli də eyni yolu getməyib. Mənim fikrimcə, indi seçim etmək böyük səhv olardı", - Starmer deyib.
O, qeyd edib ki, Tramp Avropa ölkələrinin kollektiv müdafiəyə daha çox sərmayə qoymalı olduğunu deyərkən haqlıdır.
"Şəxsi münasibətlərə gəlincə, məncə, bizdə yaxşı əlaqələr var," - Starmer ötən payızda "Trump Tower"-də nahar zamanı Trampla ilk dəfə görüşünü xatırlayaraq bildirib. Britaniya baş nazirinin sözlərinə görə, o, Trampa hörmət edir və onun nəyə nail olmağa çalışdığını anlayır.
Nəşr qeyd edir ki, əsas məsələ Böyük Britaniya və Avropanın təcavüzkar ölkə rəhbəri Vladimir Putinlə danışıqlarında mühüm rol oynayıb-oynamayacağıdır.
Bu rolu təmin etmək üçün Starmer beynəlxalq hərbi qüvvələrdən ibarət "qərarlılar koalisiyası" yaratmağa çalışır. Onun sözlərinə görə, məqsəd mümkün sülh sazişindən sonra Ukraynanın hava məkanını, limanlarını və sərhədlərini qorumaqdır.
"Mən Putinə inanmıram. Əminəm ki, Putin sülh sazişi bağlandıqdan sonra Ukraynanı müdafiəsiz qoymaq üçün israr edəcək, çünki bu, ona istədiyini- yenidən Ukraynaya hücum etmək fürsətini verəcək," - Britaniya baş naziri vurğulayıb.
Xatırladaq ki, Tramp dəfələrlə Avropanın öz müdafiə qabiliyyətinə daha çox diqqət yetirməli olduğunu vurğulayıb və "The Telegraph" nəşrinin yazdığına görə, qitənin "müharibəyə sürükləndiyini" düşünərək məyusluğunu ifadə edib.
Martın 2-də Starmer Böyük Britaniya, Fransa və Ukraynanın birgə işləyərək ABŞ-a təqdim oluna biləcək sülh razılaşması üzərində işləyəcəklərini bəyan edib. "Sky News"-un məlumatına görə, bu məqsədlə "qərarlılar koalisiyası" yaradılıb.
Bu təşəbbüs çərçivəsində Avropa və NATO-ya üzv bir neçə ölkənin qüvvələrinin Ukraynaya sülhməramlılar kimi göndərilməsi müzakirə edilir. Məqsəd Putinin yenidən silahlanmasının və gələcəkdə yeni hücum etməsinin qarşısını almaqdır.
