Portuqaliya yığmasının baş məşqçisi Roberto Martines UEFA Millətlər Liqası 1/4 finalının evdə Danimarka millisi ilə cavab oyununu şərh edib.
Arena.az məlumat verir ki, səfərdəki ilk oyunda 0:1 hesabı ilə məğlub olmuş Portuqaliya yığması evdə əsas vaxtda 3:2 hesablı qələbə sayəsəndə oyunu əlavə vaxta daşıyıb və daha iki qol vuraraq 5:2 hesablı qələbə qazanıb.
Roberto Martines matçdan sonra keçirilmiş mətbuat konfransında bunları söyləyib:
“Bu, tamam başqa oyun idi. Komandam çoxlu məqam yaratdı və beş qol vurdu. Bu, heç də asan deyil. Səfərdəki ab-hava çox yaxşı idi, ancaq Lissabonda bu, daha da yaxşı idi.
Danimarka yığmasının baş məşqçisinə (danimarkalı mütəxəssis Brayan Rimer – redaktorun qeydi) və bütün oyunçularına böyük hörmətlə. Bu, çox çətin rəqibdir, onlar əminliklə oynayırlar. Biz 180 dəqiqə ərzində yüksək səviyyəli futbol izlədik”, – UEFA-nın mətbuat xidməti ispan mütəxəssisdən sitat gətirir.
Yarışın yarımfinal mərhələsinə adlamış Portuqaliya yığmasının rəqibi Almaniya millisi olacaq.
