“Betis”in çilili baş məqşçisi Manuel Pelleqrini İspaniya La Liqasının 2024/2025-ci illər mövsümündə mart ayının ən yaxşı məşqçisi seçilib.
Arena.az bu barədə İspaniya La Liqasının rəsmi saytına istinadən məlumat verir.
Pelleqrini “Barselona”nı çalışdıran Hansi Flik və “Selta”ya rəhbərlik edən Klaudio Xiraldesi geridə qoymaqla bu mükafata sahib çıxıb. Çilili mütəxəssis “Betis”lə La Liqada mart ayında 3 oyun keçirib və hamısında qələbə qazanıb. Pelleqrininin komandası “Leqanes”i səfərdə (3:2), “Real”la (2:1) “Las Palmas”ı (1:0) isə doğma meydanda məğlub edib.
“Betis” məhz bu qələbələr sayəsində La Liqanın yarış cədvəlində 44 xalla 6-cı pilləyə yüksəlib. Komanda 28 turda 12 qələbə qazanıb, 8 heç-heçə edib, 8 məğlubiyyətə üzülüb.
Xatırladaq ki, Manuel Pelleqrini 2020-ci ilin avqust ayında “Betis”in baş məşqçisi təyin edilib. 71 yaşlı mütəxəssisin İspaniya klubu ilə müqaviləsi 2026-cı ilin iyun ayının sonuna qədər nəzərdə tutulub. Pelleqrini “Betis”i indiyə qədər 245 oyuna çıxarıb. Komanda bu görüşlərdə 115 qələbə qazanıb, 61 heç-heçə edib, 69 məğlubiyyətə üzülüb.
Manuel Pelleqrini karyerası ərzində ilk dəfə La Liqada ayın ən yaxşı məşqçisi seçilir.
Cari mövsümün geridə qalmış aylarında fərqlənmiş məşqçilər isə bunlardır:
Avqust 2024 – Hansi Flik (Barselona)
Sentyabr 2024 – Ernesto Valverde (Atletik)
Oktyabr 2024 – Hansi Flik (Barselona)
Noyabr 2024 – Miçel (Jirona)
Dekabr 2024 – Dieqo Simeone (Atletiko)
Yanvar 2025 – Xose Bordalas (Xetafe)
Fevral 2025 – Hansi Flik (Barselona)
