Almaniyada fəaliyyət göstərən proqram təminatı şirkəti SAP-ın səhmləri təxminən 1,6 faiz bahalaşıb. Beləliklə, Almaniya şirkətinin bazar dəyəri təxminən 314 milyard avroya çatıb.
Marja xəbər verir ki, "Novo Nordisk"in səhmləri 2 faizdən çox ucuzlaşıb, şirkətin bazar dəyəri 305 milyard avroya düşüb. Beləliklə, Almaniyanın SAP şirkəti Avropada birjada səhmləri ticarət olunan ən dəyərli şirkət olub.
Şirkətləri satış və təchizat üzrə proqram təminatı ilə təmin edən SAP-ın səhmləri 2024-cü ildə təxminən 40 faiz, bu il isə 12 faiz bahalaşıb. Keçən il SAP-ın gəlirləri gözlənildiyindən daha çox artıb, bu, ilk növbədə bulud və süni intellektə güclü tələbat hesabına baş verib.
"Ozempic" və "Wegovy" dərmanlarının istehsalçısı Danimarkanın "Novo Nordisk "şirkətinin səhmləri, yeni nəsil piylənmə dərmanı "Cagriseman"ın sınaqlarından əldə edilən məlumatların investorları məyus etməsindən sonra son 60 gündə dəyərinin 40 faizini itirib.
