Çin avtomobil nəhəngi BYD Co.-nun keçən il satışları 100 milyard dolları keçərək, gəlir baxımından İlon Maskın Tesla şirkətini geridə qoyub.
Marja xəbər verir ki, baş ofisi Şençjendə yerləşən şirkətin gəliri dekabrın 31-də başa çatan 12 aylıq dövrdə 766 milyard yuanlıq proqnozu üstələyərək 777 milyard yuan (107 milyard dollar) təşkil edib.
ABŞ-ın Tesla şirkəti 2024-cü ildə 97,7 milyard dollar gəlir əldə edib.
BYD-nin xalis mənfəəti də illik müqayisədə 34 faiz artaraq 40,3 milyard yuan təşkil edib və analitiklərin 39,5 milyard yuanlıq proqnozlarını üstələyib.
BYD, elektrikli avtomobillər üçün dünyanın ən böyük və ən rəqabətli bazarı olan Çində sürətlə zirvəyə yüksəlib. Təkcə bu il BYD elektrikli avtomobillərdə 5 dəqiqəyə 400 km məsafə qət etməyi vəd edən yeni şarj sistemini və ən sadə modellərində belə sürücüyə qabaqcıl yardım texnologiyalarını təqdim edib. BYD-nin Honq-Konqda ticarət olunan səhmləri bu il təxminən 51 faiz bahalaşıb.
Ötən il şirkətin cəmi avtomobil satışı 4,27 milyon ədəd təşkil edib. BYD, bu il 5-6 milyon ədəd civarında avtomobil sata biləcəyi nəzərdə tutur.
İlk 2 ayda satışı 93 faiz artıb
BYD şirkətinin 2025-ci ilin ilk iki ayında satışı ötən ilin eyni dövrünə nisbətən 93 faiz artaraq 623 min 300 ədəd təşkil edib.
BYD bazar dəyərinə görə hələ də Tesla-dan geri qalır. ABŞ-da yerləşən Tesla-nın bu il səhmlərinin 38 faiz ucuzlaşmasına baxmayaraq, bazar dəyəri 800 milyard dollardır. BYD-nin bazar dəyəri təxminən 157 milyard dollardır.
BYD hələ də ABŞ-da minik avtomobillərini satmır, çünki Çin istehsalı olan avtomobillərə tətbiq edilən yüksək gömrük tarifləri mövcuddur. Lakin şirkət Avropada, Sinqapur və Tayland kimi Asiya bazarlarında, eləcə də Avstraliyada böyük irəliləyişlər qeyd edib.
Tesla-nın Çində satışı isə ardıcıl beşinci aydır azalır.
BYD-nin sədri və təsisçisi Vanq Çuanfu (Wang Chuanfu) verdiyi açıqlamada, şirkətin Çindən kənarda müvəffəqiyyətli olmaq məqsədi də daxil olmaqla məhsulun rəqabət qabiliyyətini artırmaqla yanaşı tədqiqat və inkişafı artırmağı planlaşdırdığını söylədi.
