“Barselona”nın ulduzu, braziliyalı cinah hücumçusu Rafinya nümunə götürdüyü oyunçular haqqında söhbət açıb.
Arena.az “Barça Universal” dərgisinə istinadən, braziliyalı ulduzun müvafiq açıqlamasını təqdim edir:
“Mənim təqlid nümunəm kimdir? Neymar və Ronaldinyo. Bu iki oyunçu mənim üçün nəhəng ilham mənbəyi olub. Mən Ronaldinyonu onun oynadığı vaxtlarda mütəmadi müşahidə etmirdim, çünki çox gənc idim. Amma “YouTube” sayəsində mən onun iştirakı ilə çarxlara baxa bildim və həmçinin Rivaldo, Ronaldo kimi digər oyunçuların…”, deyə hücumçu həmvətənlərinin adlarını məmnunluqla çəkib.
Rafinya Braziliyanın “Avai” klubunun yetirməsidir. Karyerasnın Avropa dönəminə “Vitoriya”da (Gimaraynş) başlamış futbolçu “Sportinq” (Lissabon), “Renn” və “Lids”də çıxış edib. 2022-ci ilin iyul ayında “Barselona” Rafinyanı 58 milyon avro məbləğ müqabilində “Lids”dən “blauqrana”nın heyətinə qatıb. Braziliyalı hücumçunun Kataloniya klubu ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə Rafinya “Barselona” üçün bütün yarışlarda 42 oyun keçirib, 27 qol və 20 məhsuldar ötürmə ilə fərqlənib.
Rafinyanın “Barselona” karyerası ümumilikdə 129 oyun, 47 qol və 45 məhsuldar ötürmədən ibarətdir.
Braziliyalı hücumçu Kataloniya nəhəngi ilə 2022/2023-cü illər mövsümündə İspaniya La Liqasını qazanıb və həmin mövsüm İspaniya Super Kubokunun (2022/2023, 2024/2025) qalibi olub.
Rafinya 2021-ci ilin oktyabr ayında debüt etdiyi Braziliya milli komandasının heyətində 32 oyuna çıxıb, 11 qol vurub, 7 məhsuldar ötürmə verib.
“Transfermarkt” internet-portalı 28 yaşlı braziliyalı cinah hücumçusunun transfer dəyərini 80 milyon avro məbləğində qiymətləndirir.
