Beynəlxalq Olimpiya Komitəsinin (BOK) prezidenti Tomas Bax “Bayern”in cari mövsüm Çempionlar Liqasını qazanacağına ümidlidir.
Arena.az xatırladır ki, UEFA Çempionlar Liqasının 2024/2025-ci illər mövsümünün final oyunu may ayının 31-də “Bayern”in doğma stadionu – “Alyans Arena”da keçiriləcək.
“İlk növbədə, mən Çempionlar Liqasının mayın 31-də keçiriləcək finalını ziyarət edəcəyəm. Ümidvaram ki, “Bayern” nəhayət ki qəniməti evdə qazanacaq. “Real”? Yaxşı görək, siz heç finala çıxmayacaqsınız. Mən idman yarışlarına baxmaqla zövq almağa və fəxri prezident qismində çıxış etməklə gənc idmançılarla görüşməyə hazırlaşıram. Oturmaq və həzz almaq, meydanda və ondan kənarda baş verənlərə görə heç bir məsuliyyət daşımadan”, – “France 24” dərgisi alman məmurdan sitat gətirir.
Xatırladaq ki, martın 20-də Beynəlxalq Olimpiya Komitəsinin prezidenti vəzifəsinə üzgüçülük üzrə ikiqat olimpiya çempionu, 41 yaşlı zimbabveli idmançı Kirsti Koventri seçilib. Kirsti təşkilata rəhbərlik edəcək ilk qadın olub. Tomas Bax isə vəzifəsini iyun ayının 23-də təhvil verəcək. Kirsti Koventi Beynəlxalq Olimpiya Komitəsi prezidentinin bütün səlahiyyətlərini məhz bu tarixdən etibarən üzərinə götürəcək. Bax isə bundan sonra Beynəlxalq Olimpiya Komitəsinin (BOK) fəxri prezidenti kimi fəaliyyətini davam etdirəcək.
