İstanbul Cəza Məhkəməsi şəhərin bələdiyyə sədri Əkrəm İmamoğlu barəsində həbs qətimkan tədbiri seçib və o, tezliklə həbsxanaya aparılacaq.
“Report” “A haber” telekanalına istinadən xəbər verir ki, məhkəmə prokurorun bələdiyyə sədrinin həbsə ilə bağlı vəsatətini təmin edib.
İmamoğluya qarşı iki ittiham irəli sürülüb. Biri meriyadakı korrupsiya, digəri terrora yardımdır. Onun korrupsiya işi ilə bağlı həbs edildiyi qeyd olunur.
Siyasi analitik Kənan Novruzov Editor.az-a açıqlamasında bildirib ki, ittiham tərəfinin vəsatətində “silahlı terror təşkilatına yardım etmək”, “cinayətkar təşkilat yaratmaq”, “tender nəticələrini saxtalaşdırmaq” və “rüşvət alma” iddiaları yer alıb:
“Ə. İmamoğlu ilə yanaşı, daha 18 nəfər – Əli İlbak, Adəm Tuncay, Əhməd Köksal, Əli Nuhoğlu, Əyyub Subaşı, Kamil Timur Dəlibaş, Murat Abbas, Mete Sarıaltun, Alpər Aydın, Serdal Taşkın, Sərkan Öztürk, Mustafa Nihat Sütlaş, Süleyman Atik, Əhməd Çiçək, Yusuf İlbak, Sərvət Yıldırım, Serdar Haydanlı və Buğra Gökçə haqqında həbs qərarı çıxarılıb.
Ə.İmamoğlu Türkiyənin tanınmış siyasətçilərindən, prezidentliyə əsas namizəd şəxslərdəndir. Onun həbsinin ölkədə ciddi ajiotaj yaratması təbiisir. Ə.İmamoğlunun diplomu ləğv ediləndən və saxlanılandan sonra ölkədə vəziyyət qarışıb. Xüsusilə İstabulda xalq və müxalifət ayağa qalxıb. Əslində bu, hakimiyyətə sərf etməyən ssenaridir”.
K. Novruzovun sözlərinə görə, “İmamoğlu işi” ilə bağlı bir neçə versiya var:
“İlk ağla gələn və birbaşa məntiqin dediyi budur: hakimiyyət İmamoğlunun reytinqindən narahat olub və onu “oyundankənar” vəziyyətə salmaq istəyir. Amma nəzərə almaq lazımdır ki, prezident Rəcəb Tayyib Ərdoğan ağıllı siyasətçidir. O, riskləri və imkanları real qiymətləndirir. Ərdoğan yaxşı başa düşür ki, İmamoğlunun həbsi onu qəhrəmana çevirə və tərəfdarlarının sayını artıra bilər. Bu isə atılan addımın bumeranq effekti verməsi deməkdir. Ərdoğanın belə ciddi səhv edəcəyini düşünmürəm.
İkincisi, ola bilsin ən ciddi məsələ “aysberqin görünməyən tərəfindədir”. Bəlkə də, indi baş verənlər İmamoğlunun gələcəkdə prezident olacacına işarədir. Ola bilsin, artıq onun gələcəkdə dövlət başçısı seçilməsi üçün proses başlanıb. Nəzərə almaq lazımdır ki, Türkiyə xalqı həmişə əziləni müdafiə edir. Bu mənada merin başına gələnlərin ona əlavə divident qazandıracağı istisna deyil. Ümumiyyətlə, həbsin İmamoğlunun siyasi karyerasına birmənalı şəkildə zərbə olacağını demək yanlış olar. Unutmaq lazımdır ki, Ərdoğan özü də 1999-cu ildə bələdiyyə sədri vəzifəsini yerinə yetirərkən həbs olunmuşdu. Məhz 4 ay 10 günlük həbsdən sonra onun siyasi həyatında tamamilə yeni mərhələ başlandı.
Üçüncü bir tərəfdən, müxalifətin özü də prosesdə iştirak edə bilər. Belə ki, İmamoğlu artıq digər müxalifət liderləri üçün real rəqibə çevrilib. Təsadüfi deyil ki, İmamoğlu barədə müvafiq qərardan sonra əsas müxalifət partiyası olan CHP fəallaşıb. CHP – nin keçmiş sədri Kamal Kılıçdaroğlunun yenidən siyasi səhnəyə qayıtması məsələsi gündəmdədir”.
Siyasi analitik bildirib ki, İmamoğlu CHP-dən prezidentliyə yeganə namizəd idi: “İndi onun yerinə başqa namizəd müəyyənləşdirmək lazım gələcək. Bu mənada İmamoğluya qarşı ittihamlar və onun həbsi müxalifət daxili ziddiyyətin təzahürü kimi də qiymətləndirilə bilər.
Əlbəttə, İmamoğlunun həbsindən həm daxildə, həm də xaricdə iqtidar əleyhinə istifadə etmək istəyənlər və bunu demokratiyanın pozulması kimi təqdim etmək istəyənlər olacaq. Artıq prosesə start verilib.
İmamoğluya qarşı ittihamlar və onun həbsi Türkiyədə sabitliyi pozmaq istəyənlər üçün də fürsətdr. Bu mənada bir neçə İstanbulda davam edən etirazların gələcək günlərdə bir az da güclənməsi mümkündür.”.
//Gülnarə Abasova, Editor.az
