“İlk növbədə qeyd etmək lazımdır ki, atəşkəs məsələsində müvəqqəti sülh və davamlı barış arasında fərq mövcuddur. Hazırda ABŞ-ın moderatorluğu ilə Ukrayna və Rusiya arasında aparılan danışıqlarda məhz 30 günlük atəşkəs məsələsi müxtəlif konfiqurasiyalarda müzakirə olunur. Ukrayna, təklif edilən ümumi atəşkəsi (bütün təmas xətti boyunca, dənizdə, havada və quruda) tam şəkildə qəbul edərək, sülhə meyilli olduğunu və dialoqa hazır olduğunu göstərdi.
Lakin Putin, Tramp ilə telefon danışığından sonra bu təklifi faktiki olaraq rədd etdi”.
Bu fikirləri Bizim.Media-ya açıqlamasında Ukrayna siyasi elmlər namizədi, politoloq Oleksiy Buryaçenko deyib.
Analitik hesab edir ki, Rusiya sülhdə maraqlı olsaydı, Trampla məlum telefon danışığının ardınca Ukraynaya hücum etməzdi.
“Tramp və Putin arasında razılaşdırılan yeganə məsələ enerji infrastrukturuna hücum etməmək və digər məsələlərin müzakirəsi üçün işçi qrupları vasitəsilə danışıqlara davam etmək idi.
Maraqlıdır ki, onların telefon danışığından dərhal sonra Rusiya Donetsk və Sumı bölgələrində enerji infrastrukturuna hücum etdi. Bu addım, Rusiyanın konstruktiv dialoqa və verdiyi sözlərə əməl etməyə hazır olmadığına dair şübhələri daha da artırdı”, - deyə politoloq bildirib.
Rusiya işğal etdiyi ərazilərə tam nəzarət edə bilmir:
“Eyni zamanda, Rusiya dinc Ukrayna şəhərlərini atəşə tutmağa davam edərkən, müvəqqəti atəşkəs üçün qeyri-realist və qeyri-adekvat tələblər irəli sürür. Rusiya bu tələblər sırasında Ukraynanın dörd vilayəti (Donetsk, Luqansk, Xerson və Zaporojye) üzərində qanuni nəzarət tələb edir. Maraqlıdır ki, Rusiya bu vilayətləri öz Konstitusiyasına daxil etsə də, hələ tam olaraq nəzarət edə bilmir, xüsusən də Xerson və Zaporojye şəhərlərinə. Bundan əlavə, Rusiya ABŞ-dan müvəqqəti sülh dövründə Ukraynaya silah tədarükünü və kəşfiyyat məlumatlarını dayandırmağı, Ukraynadan isə səfərbərliyi durdurmağı tələb edir”.
Bütün proseslər atəşkəsin real görünmədiyini göstərir...
Analitik əlavə edib ki, ABŞ-nin davranışları Ukraynanın Rusiya tərəfindən işğalına xidmət edir.
“Göründüyü kimi, bu şərtlər, sadəcə müvəqqəti atəşkəs üçün belə, tamamilə qeyri-adekvatdır.
Buna baxmayaraq, ABŞ nümayəndələri hələ də Rusiya ilə dialoqa davam edir və bəzən açıq şəkildə Rusiya təbliğatının narrativlərini təkrarlayır. Məsələn, Zelenskinin guya yalnız 4% dəstəyə malik olması, onun legitimliyinin şübhə altına alınması, Rusiyanın guya Ukraynanı tam mühasirəyə alması kimi iddialar səsləndirilir.
Rusiya tərəfi məharətlə Trampı və onun komandasını manipulyasiya edərək, Ukraynanın mövqelərini zəiflətmək və müzakirələri «dondurmaq» niyyətindədir. Bu isə Ukrayna üçün təhlükəsizlik təminatları olmadan baş verə bilər və nəticədə, Rusiyanın Ukraynada marionet bir hökumət qurmaq planları reallaşa bilər”, - deyə Oleksiy Buryaçenko əlavə edib.
Tehran Orucoğlu, Bizim.Media
Nə baş verir?
