Portuqaliya yığması və “Əl-Nəsr”in kapitanı, 40 yaşlı veteran ulduz hücumçu Kristiano Ronaldo daha bir müstəsna rekordu ilə gündəmə gəlib.
Arena.az “Kriş” UEFA Millətlər Liqasını 1/4 finalının Danimarka yığması ilə Lissabonda keçirilmiş cavab oyununda rəqib qapısına qol vuraraq, komandasının 5:2 (əsas vaxt 3:2; ilk oyun 0:1) hesablı qələbəsinə töhfəsini verib.
Beləliklə, Ronaldo Portuqaliya yığmasının heyətində 132-ci qələbəsini qazanaraq, mütləq rekord müyyənləşdirib. “Kriş” daha əvvəl “Monterrey”in 38 yaşlı ispan mərkəz müdafiəçisi Serxio Ramosla şərik olduğu, milli komandanın heyətində 131 qələbədən ibarət rekordu qırıb. Bu münasibətlə Ronaldoya “Ginnesin rekordlar kitabı”nın rəsmi sertifikatı təqdim edilib.
Əlavə edək ki, Kristiano Ronaldo hazırda kapitanı olduğu, 2003-cü ilin avqust ayında debüt etdiyi Portuqaliya yığmasının heyətində 219 oyuna 136 qol vurub və 46 məhsuldar ötürmə verib.
Ronaldonun yığma komandanın heyətindəki oyun və qol sayı mütləq dünya rekordudur.
