“Barselona”nın 22 yaşlı ispan mərkəz yarımmüdafiəçisi Pedri bir gün “Qızıl top”u qazanmaq istəyi haqda söhbət açıb.
Arena.az AS dərgisinə istinadən məlumat verir ki, bu arzusuna rəğmən, gənc futbolçu treblə üstünlük verdiyini də açıqlayıb:
“Bu, çətindir. Amma hər şey haqda xəyal etmək olar. Ümidvaram, mən bir gün “Qızıl top”la təltif ediləcəyəm, amma mən treblə üstünlük vərərdim. Komanda məqsədlərinə nail olduqda, fərdi mükafatları qazanmaq daha asan olur”, deyə yarımmüdafiəçi fikrini əsaslandırıb.
Pedri futbola “Teqeste” klubunda qədəm qoyub, buradan “Xuventud Laquna”ya keçib. Ardınca “Las Palmas”a yol tapmış Pedri burada təkmilləşib. İspan yarımmüdafiəçi “Barselona”ya elə, “Las Palmas”dan 2020-ci ilin iyulunda icarə müqaviləsinin başa çatması ilə qoşulub. Pedrinin “blauqrana” ilə müqaviləsinin müddəti 2030-cu ilin iyun ayının sonuna qədər qüvvədədir.
Cari mövsümdə Pedri “Barselona”nın heyətində 42 oyuna çıxıb, 5 qol vurub və 7 məhsuldar ötürmə verib.
Pedrinin “Barselona” karyerası ümumilikdə 185 oyun, 25 qol və 20 məhsuldar ötürmədən ibarətdir.
Pedri 2021-ci ilin mart ayında debüt etdiyi İspaniya yığma komandasının heyətində 32 oyuna çıxıb, 2 qol və 3 məhsuldar ötürmə ilə fərqlənib.
Pedrinin qənimətlər muzeyində “Barselona” ilə İspaniya La Liqası çempionluğu (2022/2023), İspaniya Kral Kuboku (2020/2021), İspaniya Super Kuboku (2022/2023, 2024/2025) var. Həmçinin Pedri İspaniya yığması ilə 2024-cü il Avropa çempionatının qalibi olub, eləcə də 2020-ci il Yay Olimpiya Oyunlarının futbol yarışında gümüş medal qazanıb.
“Transfermarkt” internet-portalı 22 yaşlı ispan mərkəz yarımmüdafiəçisinin transfer dəyərini 120 milyon avro məbləğində qiymətləndirir.
