İranın Plan və Büdcə Təşkilatının keçmiş rəhbəri Məsud Roqani Zəncani uzun aradan sonra sükutu pozub.
Tribunainfo.az xəbər verir ki, o, “EcoIran” jurnalına geniş müsahibə verib və bir sıra sirlərin üstünü açıb.
Zəncani bildirib ki, İran molla rejiminin ABŞ-I təhdid edən bəyanatlar verməsi blefdir. Onun sözlərinə görə, Tehran artıq geri çəkilməyə başlayıb.
İranlı məmur qeyd edib ki, hazırda vəziyyət İran-İraq müharibəsinin son illərindəki vəziyyətə bənzəyir. “1988-ci ildə İraqla müharibə aparmaq imkanlarımız tükənmişdi. Hətta Xomeyni israrla sona qədər müharibə tələb edirdi. Lakin mən bildirdim ki, müharibə aparmaq üçün pulumuz və imkanımız yoxdur. Bunu faktlarla sübut elədim. O da məcbur olub sülh sazişini imzaladı”.
Zəncani onu da qeyd edib ki, bu gün durum heç də 1988-ci ildən fərqlənmir. “Bu gün Xəzinə boşdur.Ölkənin valyuta gəlirləri kəskin şəkildə azalıb. Ciddi büdcə kəsiri var. İstehsal sahəsinə investisiya qoyulmur. Malların qiyməti artıb, insanlar iqtisadi təzyiq altındadır. Hökumət işçilərinin maaşını ödəyə bilmir”.
O sonda bildirib ki, İran bugünkü yanaşma ilə idarə oluna bilməz. “Son nəticədə iqtisadi reallıqlar siyasətə sıçrayacaq. Bu isə qarşısıalınmaz proses deməkdir”.
