“Ərdoğanın getməsi Yaxın Şərqi qaynada bilər. Odur ki, ərəb ölkələri də Türkiyədə sabitliyin pozulmasına razı olmayacaq...”
“Əlbəttə, Türkiyənin çökməsində ilk növbədə Avropa İttifaqının marağı var. Çünki Türkiyə NATO-nun üzvü olsa da, Fransanın, Almaniyanın və başqa ölkələrin zurnası ilə oynamır. Oynasaydı, indi Qarabağ bizim deyildi. Əkrəm İmamoğlu isə həmin bu ölkələrə arxalanıb Ərdoğanı aradan götürmək istəyir. Türkiyə xüsusi xidmət orqanları İstanbulda gedən mitinqləri maliyyələşdirənləri ortaya çıxarsalar, görərlər ki, ilk növbədə onları ermənilər və kürdlər maliyyələşdirir. Üstəlik, bura yunanları və Qərb ölkələrini də əlavə edin. Bundan əlavə, Ərdoğanın getməsi Osmanlı imperiyasını dağıldığı vaxtdakı vəziyyətə salacaq. Xalqı ac-yalavac qoyacaqlar. Türkiyə indiki möhtəşəmliyini itirəcək”.
Bu iddialarla siyasi analitik Tahir Cəfərli Moderator.az əməkdaşının “Sizcə, Türkiyənin çökməsində hansı ölkələrin marağı var” sualını cavablandırarkən çıxış edib.
“Əlbəttə ki, öz böyüklüyünü hiss etdirən Ərdoğanı yıxmaq mümkün olmayacaq, onun getməsi Yaxın Şərqi qaynada bilər. Odur ki, ərəb ölkələri də Türkiyədə sabitliyin pozulmasına razı olmayacaq. Moskvanın isə susması o demək deyildir ki, o bununla razılaşır. Rusiya siyasətinin sirri ondadır ki, nə edəcəyini, necə edəcəyini heç vaxt deməz və gözlənilmədən hərəkətə keçər. Türkiyə-Rusiya birliyi üçün bu mitinqlər yerinə düşür. Son anda Putin Ərdoğanın köməyinə gələcək, yenicə başlanan İkinci soyuq müharibədə Rusiya,Türkiyə-İran strateji üçlüyünün yaranmasınına şərait yaradacaq. Nəzərə alsaq ki, Rusiya bu saat öz gizli silahları ilə ABŞ boyda ölkəni çökdürə bilirsə, Türkiyə Prezidentinin də hakimiyyətdə qalmasına gərəkli kömək edəcək”, - deyə davamında analitik vurğulayıb.
S.Laçın
