İtaliya futbolunun əfsanəsi, “Roma”nın keçmiş kapitanı və hücumçusu Françesko Totti gələn ay Rusiyaya səfər edəcək.
Arena.az “Sport Mediaset” dərgisinə istinadən məlumat verir ki, onun Moskvaya gözlənilən ezamiyyəti maraqla qarşılanıb.
Tottiyə Rusiya paytaxtına gözlənilən səfəri münasibətilə satirik mükafat təqdim edilib.
“Striscia la Notizia” satirik verilişinin aparıcısı Valerio Staffelli Tottini avtomobil dayanacağında haqlayaraq, ona “Qızıl tapir” adlı məzhəkəli mükafatı təqdim etməyə cəhd edib. Müvafiq mükafat böyük uğursuzluqlar və qalmaqallar müqabilində təqdim edilən bir mükafat – bir növ hoqqadır.
Staffelli dayanacaqda Tottiyə “dirəşib-durub”: “Siz aprel ayının 8-də Rusiyaya yollanacaqsınız ya yox? Doğrudurmu ki, Vladimir Putin “Roma”nın azarkeşidir?”, deyə aparıcı Tottidən söz qoparmağa çalışıb.
Bildirilir ki, təəccüblənmiş Totti bu “həyasızlığa” birtəhər dözərək, heç bir cavab verməyib, təmkinini pozmadan avtomobilinə əyləşib, mükafatı isə qəbul etməyib.
Vurğulanır ki, Tottinin dayancaqda avtomobilini qaydalarla müəyyən edilmiş yerdə deyil, piyada keçidində və əlillər üçün nəzərdə tutulmuş pandusun qarşısında saxladığı da diqqət çəkib.
Xatırladaq ki, Totti 2022-ci ildə də “Qızıl tapir”ə layiq görülüb. O vaxt “canavarlar”ın əfsanəsi arvadı ilə səs-küylü boşanması ilə gündəmə gəlmişdi.
Françesko Totti 1992/1993-cü illər mövsümündən 2016/2017-ci illər mövsümünə qədər “Roma”nın futbolçusu olub. İtalyan hücumçu bu müddətdə “canavalar”ın heyətində bütün yarışlarda 785 oyunda iştirak edib, 307 qol vurub, 210 məhsuldar ötürmə verib.
Totti “Roma” ilə İtaliya A Seriyasının (2000/2001), İtaliya Kubokunun (2006/2007, 2007/2008), İtaliya Super Kubokunun (2001/2002, 2007/2008) qalibi olub. Françesko 2006/2007-ci illər mövsümündə 26 qolla A Seriyasının ən sərrast futbolçusu olub. Əfsanəvi futbolçu həmçinin 5 dəfə (2000, 2001, 2003, 2004, 2007) İtaliyada ilin futbolçusu seçilib.
Totti İtaliya yığmasında 1998-ci ilin oktyabrında debüt edib, 58 oyuna 9 qol, 25 məhsuldar ötürmə ilə fərqlənib. Françesko “skuadra adzurra” ilə 2006-cı ildə Almaniyada keçirilmiş dünya çempionatının (DÇ-2006) qalibi olub.
Xatırladaq ki, Françesko Totti 2017-2019-cu illərdə “Roma”nın direktoru vəzifəsində çalışıb.
Totti “Roma” azarkeşlərinin sevimlisidir və “canavarlar”ın canlı əfsanəsi qəbul edilir.
