"Vaşinqtonda İranın nüvə silahı əldə etməyə yaxın olması ilə bağlı narahatlıq artmaqdadır..."
ABŞ Hind okeanındakı "Dieqo Qarsiya" Hərbi Hava Qüvvələri bazasında hərbi kontingentini əhəmiyyətli dərəcədə artırıb. Bu, İran və Yəməndəki İranpərəst husilərə qarşı təzyiqlərin gücləndiyi bir vaxta təsadüf edir.
Moderator.az xəbər verir ki, bu barədə "avia.pro" nəşri məlumat yayıb.
Məlumatda deyilir ki, xüsusilə, ABŞ müdafiə naziri Pit Heqset husilərə qarşı hərbi kampaniyanın ən azı bir neçə həftə davam edəcəyini bildirib. Bu, regionda uzunmüddətli əməliyyatlara hazırlığın aparıldığına işarə edir.
Bu hadisələrin fonunda ABŞ qüvvələri hərbi texnika və şəxsi heyəti yenidən yerləşdirir, bu isə Tehranla münaqişənin mümkün eskalasiyasına işarə edir.
Strateji aviasiyanın cəmləşdirilməsi
Açıq mənbələrdən əldə edilən məlumatlara (OSINT) görə, "Dieqo Qarsiya" atolluna ən azı beş "B-2 Spirit" strateji bombardmançısı və yeddi "C-17 Globemaster III" nəqliyyat təyyarəsi göndərilib. "Stealth" texnologiyasına görə "gözəgörünməz" sayılan B-2 bombardmançıları ağır döyüş sursatları və əlavə hərbi qüvvələr daşımaq imkanına malikdir, bu da bazanın döyüş potensialını artırır.
Bundan əlavə, ABŞ-ın regiondakı digər hərbi obyektlərində, o cümlədən Quam adasındakı bazasında 18 ədəd "KC-135 Stratotanker" yanacaqdoldurma təyyarəsi cəmləşdirilib. Bu təyyarələr uzaqmənzilli əməliyyatlar üçün havada yanacaq doldurma imkanı yaradır. Bu qədər aviasiyanın toplanması İranın hərbi və nüvə obyektlərinə qarşı genişmiqyaslı zərbələrin planlaşdırıldığı ehtimalını gücləndirir.
Hərbi-dəniz qüvvələrinin hərəkətliliyi
Eyni zamanda, ABŞ-ın "Karl Vinson" aviadaşıyıcısı Sakit okeanın qərb hissəsini tərk edərək Fars körfəzinə doğru istiqamət alıb. Burada artıq husilərə qarşı əməliyyatlarda iştirak edən USS "Harry Truman" yerləşir. Bir regionda iki aviadaşıyıcının olması nadir hadisədir və Vaşinqtonun ciddi niyyətlərini nümayiş etdirir.
Müdafiə naziri Heqsetin sözlərinə görə, martın 15-də Yəməndəki husilərin mövqelərinə qarşı başladılan hava zərbələri Qırmızı dənizdə gəmiçiliyi qorumaq məqsədi daşıyır. Lakin onların intensivliyi və miqyası daha geniş strategiyanın- İranın cilovlanmasını nəzərdə tutduğunu göstərir.
Trampın ultimatumunun təsiri
Xatırladaq ki, martın əvvəlində ABŞ prezidenti Donald Tramp İranın Ali dini lideri Əli Xameneiyə sərt ultimatum verərək, Tehranın iki ay ərzində nüvə proqramı ilə bağlı danışıqlara başlamasını tələb edib. Əks halda, hərbi əməliyyatın həyata keçiriləcəyi bildirilib.
Vaşinqtonda İranın nüvə silahı əldə etməyə yaxın olması ilə bağlı artan narahatlıq müşahidə olunur. "The New York Times" nəçrinin məlumatına görə, 2025-ci ilin fevralında Beynəlxalq Atom Enerjisi Agentliyi (MAQATE) İranın zənginləşdirilmiş uran ehtiyatlarını silah səviyyəsinə yaxın həddə çatdırdığını qeydə alıb. Bu isə Tramp administrasiyasına təzyiqləri artırıb.
