Almaniyanın avtomobil istehsalçıları Volkswagen, BMW, Mercedes-Benz, Porsche və təkər istehsalçısı Continental 27 Mart Cümə axşamı günü bazar dəyərini 4,5 milyard avro (4,84 milyard dollar) itiriblər.
Marja xəbər verir ki, bu barədə Reuters məlumat yayıb.
Nyu-York Birjasında General Motors səhmləri 9,2%, Ford səhmləri isə 2,7% ucuzlaşıb. Toyota səhmləri Tokio birjasında 4% dəyərdən düşüb.
Bu, ABŞ prezidenti Donald Trampın ABŞ-a idxal edilən bütün xarici istehsal avtomobillərə və ehtiyat hissələrinə 25% rüsum tətbiq edəcəyini söyləməsindən sonra baş verib. İnvestorlar elektrikləşdirmənin yavaş artımı və yüksək logistika xərcləri ilə onsuz da çətin vəziyyətdə olan sənayedə daha yüksək xərclər və fəsadlar yaranacağından narahatdırlar.
Reuters qeyd edib ki, yeni tariflər ABŞ-da avtomobilin orta qiymətini minlərlə dollar artıra bilər ki, bu da Donald Trampın istehlakçı inflyasiyası ilə mübarizə vədlərinə ziddir.
GlobalData araşdırma şirkətinin məlumatına görə, keçən il ABŞ-da satılan bütün avtomobillərin təxminən yarısı idxal edilib.
