Futzal üzrə U-19 Avropa çempionatının əsas mərhələsində meydan sahibi Xorvatiya ilə 3:3 hesablı heç-heçə edən edən Azərbaycan millisinin baş məşqçisi İlqar Aslanov fikirlərini bölüşüb.
Fanat.Az xəbər verir ki, o, matçın ardından Azərbaycan Futzal Federasiyasının rəsmi saytına danışıb:
“Xorvatiya millisi Avropanın güclü komandalarından biridir. Çətin görüş olacağını bilirdik. İlk oyunda Bosniya və Herseqovinaya məğlubiyyət də sanki uşaqları ayıltmışdı. Çünki dünənki görüşdən fərqli olaraq bu dəfə rəqibdən çəkinmədilər. Hətta hesabı onlar açsa da, ardıcıl qollar vurmağımız uşaqları daha da həvəsləndirdi, özünəinamı artırdı. Bu gün əzmkarlıq göstərdik. Rəqibi də yaxşı öyrənmişdik. Bilirdik ki, ilk saniyələrdən pressinq edəcəklər. Bu təzyiqə hazır idik və bizim də öz cavablarımız oldu. Qazanılan xala görə komandamı təbrik edirəm. Bu, U-19-un tarixində əsas mərhələdə qazanılan ilk xaldır. Çox oyun keçirdikcə uşaqlarda inam artacaq, təcrübə də qazanacağıq, nəticələrimiz də yaxşı olacaq”.
