Futbol üzrə Azərbaycan millisinin və “Sabah”ın sağ cinah müdafiəçisi Amin Seydiyev aldığı ağır zədə səbəbindən əməliyyat olunub.
Arena.az xəbər verir ki, bu barədə paytaxt klubunun mətbuat xidməti məlumat yayıb.
Millinin düşərgəsində zədələnən futbolçuya adduktor əzələsinin qopması diaqnozu qoyulub. O, Türkiyənin İstanbul şəhərində əməliyyat edilib. Əməliyyat uğurla başa çatıb. Seydiyev üçün mövsüm erkən başa çatıb. Onun ən yaxşı halda gələn mövsümün əvvəlində sıraya dönməsi gözlənilir.
Xatırladaq ki, Amin Seydiyev 2020-ci ilin yayından “Sabah”da forma geyinir. O, cari mövsümdə paytaxt klubunun heyətində 33 oyuna çıxıb, 2 qol vurub, 2 qöl ötürməsi edib. Seydiyevin “Sabah”ın heyətindəki ümumi statistikası isə belədir: 161 oyun, 6 qol və 8 məhsuldar ötürmə.
Seydiyev “Sabah” forması ilə Premyer Liqadakı ilk matçına 2020-ci il avqustun 22-də çıxıb. Onun debüt matçında bakılılar səfərdə “Qarabağ”a 0:2 hesabı ilə uduzublar. Müdafiəçi “Sabah”dan öncə yetirməsi olduğu “Qəbələ”də çıxış edib.
Azərbaycanın U-17, U-19 və U-21 yığmalarında da oynamış Seydiyev 2020-ci ilin oktyabrında əsas millimizdə debüt edib. 26 yaşlı futbolçu yığmamızın heyətində bütövlükdə 13 oyuna çıxıb, fərqlənə bilməyib.
Amin bir neçə gün öncə “Masazır Arena”da baş tutmuş Belarus yığması ilə yoxlama oyununun 23-cü dəqiqəsində aldığı ağır zədə səbəbindən meydanı erkən tərk etmək məcburiyyətində qalmışdı.
