19 yaşadək futzalçılardan ibarət Azərbaycan millisinin qapıçısı və kapitanı Hüseyn Abdulov federasiyanın mətbuat xidmətinə açıqlama verib.
Arena.az xəbər verir ki, Avropa çempionatının əsas mərhələsində dünən Xorvatiyadan olan həmyaşıdları ilə qarşılaşan millimizin üzvü 3:3 hesablı heç-heçəyə şərh verib:
“Oyun çox çətin, gərgin keçdi. Bosniya və Herseqovinaya qarşı keçirdiyimiz birinci matçda yenilsək də, toparlana bildik. Xorvatiya yığması ən güclülərdəndir. Onlar daim final mərhələsinə vəsiqə qazanırlar. Bu statistikaya baxmayaraq, komandamız əzmkarlıq göstərdi, əla oyun nümayiş etdirdi. Elə oyun oldu ki, qələbə də qazana bilərdik, hətta yenilgi ilə də üzləşə bilərdik. Çünki əvvəlcə onlar fərqləndilər, sonra biz ardıcıl 2 qol vurduq, uzun müddət hesabda öndə olduq. Sona 12 saniyə qalmış isə yenik duruma düşdük. Yenə də ruhdan düşmədik, özümüzə inanırdıq. Rəqib hər nə qədər güclü olsa da, sona 1 saniyə qalmış hesabı bərabrləşdirdik. Bu, əsas mərhələdə qazanılan ilk xalımız oldu. Kənardan asan görünsə də, buna nail olmaq üçün çox əziyyət çəkdik”.
Hüseyn Abdulov bu oyunda meydandan qovulmasına da münasibət bildirib:
“Qırmızı aldığım epizoda gəldikdə, vaxtında müdaxilə etməsəydim, xorvat futzalçı fərqlənəcəkdi. Həmin anda əlimi bədənimə sıxsam da, cərimə etməkdən yayına bilmədim. Əlbəttə, komandamı azlıqda qoyduğuma görə təəssüfləndim. Əsas odur ki, meydanda azlıqda qaldığımız müddətdə də qapımızı toxunulmaz saxlaya bildik”.
Millimizin kapitanı qrupdakı son oyunda – Türkiyə ilə görüşdə iştirak edə bilməyəcək:
“Qrupun son oyununda meydana çıxa bilməsəm də, komanda yoldaşlarıma inanıram. Əslində, Türkiyə millisi bu qrupun sürpriz komandasıdır. Heç kim onların bu cür çıxış edəcəyini gözləmirdi. Hər iki komanda üçün çətin görüş olacaq. Riyazi baxımdan şansımız qalsa da, reallığı nəzərə alsaq, mərhələ adlamağımız çox çətin olacaq. Ancaq reytinq xalları qazanmaq üçün komandamız ən yaxşısını etməyə çalışacaq”, deyə Hüseyn Abdulov vurğulayıb.
