İlon Mask onun nəzarətində olan "X" platformasının, süni intellekt startapı olan "xAI" tərəfindən 33 milyard dollar dəyərində satın alındığını elan edib.
Valyuta.Az xəbər verir ki, Mask 12 milyard dollarlıq borcun da daxil edilməsi ilə "X"in ümumi dəyərinin 45 milyard dollara çatdığını qeyd edib və satınalma əməliyyatının tamamilə səhmlər üzərindən həyata keçirildiyini vurğulayıb.
Məlumata əsasən, razılaşmada "Morgan Stanley" yeganə bankir kimi çıxış edib və hər iki tərəfi təmsil edib.
Beləliklə, Mask keçmiş "Twitter"lə söhbət botunu inkişaf etdirmək üçün sosial şəbəkənin məlumatlarından istifadə edən "xAI" arasındakı əlaqəni daha da möhkəmləndirib.
Mask paylaşımında “'xAI' və 'X'in gələcəkləri bir-biri ilə sıx bağlıdır; bu gün məlumatları, modelləri, hesablamanı, paylanmanı və bacarığı birləşdirmək üçün rəsmi addım atırıq. Bu birləşmə 'xAI'nin inkişaf etmiş süni intellekt imkanlarını və təcrübəsini 'X'in geniş əlçatanlığı ilə bir araya gətirərək böyük potensialın qapılarını açacaq”, – deyə qeyd edib.
Rəhim
