“1918-ci ildə Rusiyanın ermənilər vasitəsilə törətdiyi soyqırım yalnız martın 31-də baş verməyib...”
“AXC qurulduqdan sonra ilk dəfə 1919-cu ildə Azərbaycan parlamenti müzakirələr apararaq ölkəmizin ərazi bütövlüyünün müdafiəsi uğrunda öldürülən insanların xatirəsini yad etmək üçün bir günü simvolik olaraq qəbul etmək haqda qərar verdilər...”
“31 Mart Soyqırımı Günü” adlandırırıq deyə, bəzi insanlarımız elə düşünür ki, Rusiyanın ermənilər vasitəsilə Azərbaycan xalqına qarşı təşkil etdiyi bu soyqırım yalnız elə martın bircə günündə - 31-də baş verib. Bu tamamilə yanlış baxışdır”.
Bunu Moderator.az-a açıqlamasında tanınmış tarixçi, BDU-nun Azərbaycan tarixi kafedrasının dosenti Boran Əziz söyləyib.
“Əslində azərbaycanlıların soyqırımı 1917-ci ilin aprelində Bakıda Qafqaz müsəlmanlarının birinci qurultayında qəbul edilən qərarlardan sonra başlanmış və Xalq Cümhuriyyətinin yaranmasınadək fasiləsiz olaraq davam etmişdi. Amma AXC qurulduqdan sonra ilk dəfə 1919-cu ildə Azərbaycan parlamenti müzakirələr apararaq ölkəmizin ərazi bütövlüyünün müdafiəsi uğrunda öldürülən insanların xatirəsini yad etmək üçün bir günü simvolik olaraq qəbul etmək haqda qərar verdilər. Və nəticədə uzun müzakirələrdən sonra 1918-ci il martın 30-dan aprelin 1-dək Bakıda ermənilərin törətdiyi soyqırımı daha çox soydaşımızın qətlinə səbəb olduğuna və xüsusi qəddarlığıyla seçildiyinə görə bu iki tarix arasındakı 31 mart tarixini soyqırımı günü kimi qəbul etmək qərarına gəldilər”,- deyə davamında tarixçi diqqətə çatdırıb.
Sultan Laçın
