Tacikistan Prezidenti Emoməli Rəhmon həmvətənlərini qarşıdan gələn Ramazan bayramı münasibətilə təbrik edib.
Hafta.az-ın yazdığına görə, o, təbrik məktubunda qeyd edib ki, Ramazan bayramı ölkədəki sakit mühitdən və müqəddəs İslam dininin dəyərlərinə hörmətdən xəbər verir.
"Dini dəyərlər milli mədəniyyətin tərkib hissəsi kimi cəmiyyətdə əmin-amanlığın və sabitliyin möhkəmlənməsində mühüm rol oynayır. Söz ayırmaq, xalqı birliyə, şükürə, xeyirxah işlərə səsləmək Ramazan bayramının fəzilətlərindəndir" deyən Emomali Rahmon tacikləri dəbdəbəli israfçılığı dayandırmağa çağırıb.
O, uşaqların, yeniyetmələrin və gənclərin maarifləndirilməsinin vacibliyini xüsusilə qeyd edib.
“Peyğəmbərimiz bildirib ki, valideynlərin övlada ən yaxşı hədiyyəsi gözəl tərbiyədir və əgər insan öz övladına gözəl əxlaq öyrədirsə, bu, malının bir hissəsindən sədəqə verməkdən daha yaxşıdır”, - deyə Rəhmon bildirib.
Dövlət başçısı, həmçinin, əhalinin aztəminatlı təbəqəsinə yardımın vacibliyini xatırladıb, xüsusilə bayram günlərində israfçılıqdan, özünü göstərməkdən çəkinməyə çağırıb.
“İsrafçılıq və lovğalıqdan çəkinmək istənilən şəraitdə, o cümlədən bayramlarda hər bir müsəlmanın ən mühüm vəzifəsidir”, - deyə prezident qeyd edib.
Qeyd edək ki, martın 30-da Tacikistanda və digər müsəlman ölkələrində Ramazan bayramı qeyd olunacaq. Bu, müsəlmanların oruc tutmaq, sədəqə vermək və digər xeyirxah əməlləri yerinə yetirmək tələb olunan müqəddəs Ramazan ayının başa çatması ilə əlaqədardır.
