“Mançester Siti”nin baş məşqçisi Xosep Qvardiola “şəhərlilər”in ispan dayaq yarımmüdafiəçisi Rodri ilə bağlı sualı cavablayıb.
Arena.az “Yahoo Sports” dərgisinə istinadən məlumat verir ki, ispan mütəxəssisə Rodrinin, yayda keçiriləcək 2025-ci FIFA Klub Dünya Kubokunda iştirak edə bilib-bilməyəcəyi ilə bağlı sual ünvanlanıb.
“Pep” fürsətdən istifadə edərək, ispan futbolçunun səhhəti haqda məlumat verib:
“Mən bilmirəm… Ümidvaram, bunu arzu edirəm. Qulaq asın, əgər o, sabah oynaya bilsəydi, bu, əla olardı! Amma məhz indi yanlış qərarlar qəbul etmək olmaz.
Həkimlər mənə deyiblər ki, müvafiq zədədən sonra bərpa müddəti yeddi ay yarım, səkkiz ay çəkəcək. Rodri artıq altı ay yarımdır ki, müalicə alır. O, özünü meydanda yaxşı hiss edir, amma gerçək oyunlarda rəqabət tamam başqadır, odur ki, baxıb-görəcəyik. Biz, onunla hər şeyin qaydasında olduğuna əmin olmalıyıq və ancaq bundan sonra qərarlar qəbul edəcəyik”, deyə Qvardiola vurğulayıb.
Xatırladaq ki, Rodri dizin çarpaz bağ zədəsi kimi çox ağır zədədən müalicə alır. İspan “dayaqçı”nın cari ilin iyun ayında başlayacaq 2025-ci il klublarası dünya çempionatında iştirak üçün nəzəri imkanı var.
Rodriqo Ernandes Madrid “Atletiko”sunun yetirməsidir, ispan “dayaqçı” 2007-2013-cü illərdə “döşəkçilər”in klub sistemində olub. Daha sonra Rodri “Vilyarreal”a keçib. Ancaq 2018-ci ildə yarımmüdafiəçi 2019-cu ilə qədər oynadığı “Atletiko”ya qayıdıb.
Rodri hazırda çıxış etdiyi “Mançester Siti”yə 2019-cu ilin iyulunda 70 milyon avro məbləğ müqabilində elə, “Atletiko”dan keçib. Rodrinin “Mançester Siti” ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə Rodri “şəhərlilər” üçün 3 oyun keçirib, məhsuldar fəaliyyəti ilə diqqət çəkməyib. Təcrübəli yarımmüdafiəçi “şəhərlilər”in heyətində bütövlükdə 260 oyuna çıxıb, 26 qol və 30 məhsuldar ötürmə müəllifi olub.
Rodri “Mançester Siti” ilə İngiltərə Premyer Liqasının (2020/2021, 2021/2022, 2022/2023, 2023/2024), İngiltərə Kubokunun (2023), İngiltərə Liqa Kubokunun (2020, 2021), İngiltərə Super Kubokunun (2020), Çempionlar Liqasının (2022/2023), UEFA Super Kubokunun (2023/2024), FIFA Klub Dünya Kubokunun (2024) qalibi olub. İspan futbolçu həmçinin Çempionlar Liqasında 2022/2023-cü illər mövsümünün oyunçusu seçilib. Rodri 2024-cü il “Qızıl top”un qalibidir.
Rodriqo Ernandes 2018-ci ilin martında debüt etdiyi İspaniya yığmasının heyətində 57 oyun keçirib, 4 qol vurub, 2 məhsuldar ötürmə verib. Rodri İspaniya yığması ilə 2023-cü il UEFA Millətlər Liqasının və 2024-cü il Avropa çempionatının qalibi olub.
“Transfermarkt” internet-portalı 28 yaşlı yarımmüdafiəçinin transfer dəyərini 130 milyon avro məbləğində qiymətləndirir.
