I Liqada ikinci mövsümünü keçirən «Difai» 19-cu turda «siftə» etdi.
«Fədailər tarixi ərzində ilk dəfə çempionatın ardıcıl iki turunda qələbə qazanmağı bacardı.
Öncə «Cəbrayıl»ı Bayılda 4:0 üstələyən Qarabağ qazilərinin təmsilçisi bu dəfə MOİK-i Binədə yendi.
Aydın Qasımovun çalışdırdığı komandaya qalibiyyəti gətirən qollara Kristian Kamta, Muhammed Alfa və Fərid Kərimzadə imza atdı.
Beləcə, «Difai» xal ehtiyatını 19-a çatdırdı və son 2 sıradan bir qədər uzaqlaşdı. İndi onlar «Cəbrayıl» və «Qaradağ Lökbatan»ı qabaqlayaraq, 8-ci pillədə yer alıb.
Binədəki matçdan sonra «Difai»nin düşərgəsində şadyanalıq hökm sürüb. Məşqçilər və futbolçular uğurlu nəticəni bir yerdə qeyd edib, ortalığa maraqlı mənzərə çıxıb.
SPORTİNFO.AZ
