“Mançester Siti”nin baş məşqçisi, ispan mütəxəssis Xosep Qvardiola “şəhərlilər”in cari mövsümünə dair açıqlama verib.
Arena.az məlumat verir ki, “Pep” İngiltərə Kubokunda mümkün qalibiyyətlə bağlı sualı cavablayıb.
O, həmçinin “şəhərlilər”in növbəti mövsümə UEFA Çempionlar Liqasına vəsiqə qazana biləcəyinin böyük uğur olacağını vurğulayıb:
“Mövsüm uğursuz alınır, bu isə bizim bir qənimət qazanacağımızla dəyişməyəcək. Amma əlbəttə, biz bunu istəyirik. UEFA Çempionlar Liqasına düşmək isə, artıq dediyim kimi, böyük uğur olacaq. İngiltərə Kubokunda qalibiyyət də – nəhəng uğurdur, amma mövsüm uğursuz alındı.
Şəxsən mənim üçün bu, yaxşı dərsdir, mən çox şey öyrəndim. Ümidvaram, klub da ibrət aldı. UEFA Çempionlar Liqasına təsnifatımız nəhəng uğur olacaq! Əvvəllər adamlar mənim bu sözlərimə inanmırdılar, indi inanırlar”, – deyə Qvardiola komandanın mövcud durumuna dair düşüncələrini paylaşıb.
29 oyunda 48 xal toplamış “Mançester Siti” İngiltərə Premyer Liqasının yarış cədvəlinin 5-ci pilləsində qərarlaşıb. “Şəhərlilər”i UEFA Çempionlar Liqasına vəsiqə verən 4-cü pillədəki “Çelsi”dən (49 xal) 1 xal ayırır.
İngiltərə Kubokunda isə “Mançester Siti” yarışın yarımfinal mərhələsində “Nottingem Forest”lə qarşılaşacaq.
