Avropa hərbi qrupları Ukraynaya göndərilir. Məlumata görə, Avropa hərbi qrupları sülhməramlıların sayını və onların yerləşdirilmə yerlərini müəyyən etmək üçün yaxın həftələrdə Ukraynaya gələcək. Belə ki, Avropa ölkələrinin yüksək rütbəli hərbçiləri Rusiya ilə mümkün qarşıdurmaya – hibrid münaqişə və ya birbaşa hərbi toqquşma ehtimalına qarşı hazırlıq görür.
Moderator.az-a danışan politoloq Elçin Abdullayev deyib ki, Avropa hərbi qruplarını Ukraynaya göndərməklə Ukraynaya olan dəstəyini daha da gücləndirir və münaqişənin yeni bir mərhələyə keçdiyini göstərir:
“Əgər bu qüvvələr təkcə müşahidəçi və yaxud da sülhməramlı kimi iştirak edəcəksə, bu başqa bir mövzudur. Yox, əgər bu qüvvələr hərbi əməliyyatlara dəstək niyyəti ilə Ukrayna ərazilərində yerləşdirilirsə, bu o deməkdir ki, Qərb Ukraynaya təkcə maliyyə və silah yardımı etmir, eyni zamanda əsgəri qüvvə ilə də dəstək verir. Qərbin bu addımı dünya üçün ciddi bir təhlükəyə çevrilə bilər. Çünki Moskva bunu açıq aşkar NATO -nun müharibəyə daha da aktiv şəkildə qoşulması kimi qiymətləndirəcək və Moskvanın bu cür qiymətləndirilməsi qaçılmazdır. Belə olan halda, Rusiyanın daha sərt hərbi cavab vermə ehtimalı artmış olur. Moskva Qərbin bu addımını şübhəsiz ki, eskalasiya kimi dəyərləndirib Ukraynadakı hədəfləri daha genişmiqyaslı raket və hərbi hücumlara tutacaq. Hesab edirəm ki, Putin Qərb ölkələrini də təhdid edərək nüvə ritorikasını yenidən gündəmə gətirə bilər. Ümumiyyətlə, Avropa hərbi qruplarını Ukraynaya göndərməklə müharibənin uzanmasına və daha geniş miqyas almasına gətirib çıxara bilər və bu Rusiya ilə Ukrayna arasında baş vermiş müharibənin sülh yolu ilə həll olunmasını çətinləşdirəcək. Çünki Moskva və Qərb arasında qarşıdurma dərinləşdikcə kompromis imkanları da azalmış olur. Münaqişənin gedişatı Avropa ölkələrinin nə qədər irəli gedəcəyindən və Rusiyanın buna hansı səviyyədə cavab verəcəyindən asılı olacaq”.
Mehin Mehmanqızı
