AZ

İcra başçısının ifadəsi elan edildi: "Sui-qəsdi hiss etməmişəm" İcra başçısının ifadəsi

Lənkəran Şəhər Hakimiyyətinin başçısı Taleh Qaraşovu öldürməyi planlaşdırmaqda, terror aktlarına hazırlıq görməkdə və digər ağır cinayətlərdə ittiham olunan Bəhruz Əskərovun cinayət işi üzrə məhkəmə prosesi keçirilib.

Publika.az Teleqraf-a istinadən xəbər verir ki, Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən prosesdə zərərçəkmiş T.Qaraşovun nümayəndəsi Taleh İbrahimovun iştirak etdiyi məlum olub.

Nümayəndə deyib ki, müvəkkilin təqsirləndirilən şəxsə qarşı heç bir maddi iddiası yoxdur, lakin ona qarşı şikayəti yerində qalır.

Daha sonra Taleh Qaraşovun ibtidai istintaq zamanı verdiyi ifadəsi elan olunub. O, ifadəsində göstərib ki, təqsirləndirilən Bəhruz Əskərovu tanımır, onunla heç bir ədavəti yoxdur. Onun sözlərinə görə, həyatına sui-qəsd hazırlığı ilə bağlı məlumatı mətbuatdan öyrənib: "Mənim heç kimlə düşmənçiliyim olmayıb. Məni kiminsə izləməsini, həyatıma təhlükənin olmasının, sui-qəsd etməsini hiss etməmişəm".

Daha sonra hakim Səbuhi Hüseynov deyib ki, zərərçəkmiş şəxsin ifadəsi tədqiq olunub. O, şahidlərin dindirilməsi mərhələsinin başlandığını açıqlayıb.

Hakim qeyd edib ki, iş üzrə üç şahid var, həmin şahidlərdən biri hazırda həbsdədir. Hakimin sözlərinə görə, şahidlərdən ikisi növbəti iclasda dindirilməsi təmin olunacaq, həbsdə olan digər şahidin isə dindirilməsi məsələsi növbəti iclasda müzakirə ediləcək.

Hakim həmin iki şahidin məhkəməyə çağırılması üçün iclasın təxirə salındığını açıqlayıb.

Məhkəmənin növbəti iclası aprelin 29-na təyin olunub.

Seçilən
135
10
publika.az

10Mənbələr