ABŞ-nin demokrat senatoru Kori Buker Senatda 25 saat 5 dəqiqə fasiləsiz davam edən və prezident Donald Trampı tənqid edən çıxış edib.
Yeniavaz.com CNN telekanalına istinadla xəbər verir ki, beləliklə o, Senatdakı çıxışların uzunluğuna görə tarixi rekorda imza atıb.
Əvvəkli rekord 1957-ci ildə 24 saat 18 dəqiqə danışaraq, o zaman bəzi ştatlarda seqreqasiya qanunlarını müdafiə edən senator Strom Termonda məxsus olub.
Buker çıxışına bazar ertəsi Şərq Saatı ilə saat 19:00-da başlayıb. O, fiziki imkanları icazə verdiyi müddətdə danışacağına söz verib.
Telekanalın məlumatına görə, Buker yanında “İncildən bir parça”dan başqa heç nə olmadığını bildirib. Onun çıxışı səhəri gün axşama qədər davam edib.
Nyu Cersi senatoru Trampı xarici siyasətinə, o cümlədən Ukrayna və Avropa müttəfiqlərinə münasibətinə görə tənqid edib.
Qeyd edək ki, Buker 2028-ci il prezident seçkilərində Demokratların mümkün namizədi kimi nəzərdən keçirilir.
Xatırladaq ki, uzun çıxışlar ABŞ Senatında qeyri-adi hal deyil. Burada deyilən sözlərin sayında vaxt məhdudiyyəti yoxdur. Bu cür çıxışlar filibuster taktikasının bir hissəsi kimi - qanun layihələri, qətnamələr, düzəlişlər və ya digər məsələlərlə bağlı qərarların qəbul edilməsinin qarşısını almaq üçün müzakirələri qeyri-müəyyən müddətə uzatmaq üçün istifadə olunur.
Respublikaçılar əvvəllər də bu taktikadan istifadə ediblər - məsələn, 2013-cü ildə respublikaçı Ted Kruz 21 saat çıxış edib.
