Arxeoloqlar İsrailin Tel Azekah şəhərində bir uşaq tərəfindən yerdə tapılan "gözəl daş"ın əslində 3800 il əvvəl hazırlanmış Tunc dövrünə aid skarab amuleti olduğunu təsdiqləyiblər.
Hafta.az-ın yazdığına görə, İsrail Qədim Əsərlər İdarəsindən verilən açıqlamada, üç yaşlı Ziv Nitzanın daşı çınqıllarla örtülmüş torpaq yolda gəzərkən tapdığı bildirilib.
"O, ətrafındakı 7 min daşdan birini seçdi. Sonra onun içindəki qumu təmizlədi və gördü ki, bunda fərqli bir şey var" deyə Zivin böyük bacısı Omer Nitzan bildirib. “Mən valideynlərimi bu gözəl daşı görməyə çağırdım və biz arxeoloji tapıntı aşkar etdiyimizi başa düşdük! Bu barədə dərhal İsrail Qədim Əşyalar İdarəsinə məlumat verdik” deyə əlavə edib.
Qədim Əşyalar İdarəsi bu daşın Orta Tunc dövrünə aid Kənan skarab amuleti olduğunu müəyyən edib. Kənanilər Levant bölgəsində yaşayan və Misirlə möhkəm əlaqələri olan qədim xalq idi. Tədqiqatçılar bildirirlər ki, Orta Tunc dövründə Kənanilər möhürlərdən və skarablara bənzər amuletlərdən istifadə edirdilər.
Onlar əlavə edirlər ki, bəzi simvollar və mesajlar daşıyan bu cür artefaktlara adətən dövlət və şəxsi binalarda, eləcə də bölgədəki qədim türbələrdə rast gəlinir. Bu cür hörmətli həşəratların simvollarından istifadə təcrübəsi Misirdə yaranıb. Qədim misirlilər peyin toplarını yuvarlayan skarabları "Günəş diskini" göy sferasında gəzdirən Günəş tanrıları ilə əlaqələndirirdilər.
Əslində, qədim misirlilər skarab şəklini tanrının təcəssümünün simvolu kimi gördüklərindən, hətta Misir dilində böcəyin adı da "yaratmaq" felindən yaranıb.
Arxeoloqlar 15 ildən artıqdır ki, Tel Azekahda qazıntılar aparır və minlərlə il əvvəl bölgədəki həyata işıq salan çoxsaylı artefaktlar tapıblar. Tapıntılar arasında Yəhuda Krallığına aid qədim şəhər divarları və kənd təsərrüfatı tikililəri var.
