"Avropalılar Ukraynada sülhməramlı missiya üçün NATO-nun imkanlarından istifadəni nəzərdən keçirir..."
Kiyevin Qərb müttəfiqləri koalisiyası tərəfindən hazırlanmış planlara əsasən, NATO Ukraynada Avropanın sülhməramlı missiyasına dəstək verməkdə əsas rol oynaya bilər.
Moderator.az xəbər verir ki, bu barədə "Financial Times" nəşri yazıb.
Nəşrə verdiyi açıqlamada avropalı məmurlar bildirir ki, təkliflərdən birinə əsasən, Ukraynada sülhməramlı qüvvələr yerləşdirilərkən, NATO-nun komanda və nəzarət strukturları istifadə ediləcək. Bu təklifə görə, sülhməramlılar həmçinin NATO-nun kəşfiyyat, müşahidə və araşdırma sahəsindəki ümumi imkanlarından faydalanacaq.
Bununla yanaşı, məmurların sözlərinə görə, bu təklif müzakirə edilən bir neçə variantdan biridir və yekun razılaşma bağlanana qədər dəyişdirilə bilər.
NATO-nun iştirakı, həmçinin təhlükəsizlik qüvvələri yaratmaq tərəfdarları tərəfindən ABŞ-ı bu fəaliyyətə dolayı yolla cəlb etmək və Vaşinqtonun səssiz dəstəyini təmin etmək üçün bir yol kimi də nəzərdən keçirilir.
"Əgər biz Ukraynada onlarla ölkənin qüvvələrini və resurslarını yerləşdirməyi planlaşdırırıqsa, NATO istifadə edə biləcəyimiz tək komanda və idarəetmə variantıdır", - məmurlardan biri bildirib.
Beynəlxalq Strateji Araşdırmalar İnstitutunun quru qoşunları üzrə baş elmi işçisi Ben Barrinin sözlərinə görə, Böyük Britaniya və Fransa Ukraynada böyük çoxmillətli hərbi kontingentin idarə edilməsi üçün komanda və idarəetmə vasitələrinə sahibdir. Lakin, onun sözlərinə görə, "əgər siz NATO-nun aktivlərindən və mexanizmlərindən istifadə edə bilsəniz, bu, işi əhəmiyyətli dərəcədə asanlaşdıracaq".
"Amerikanın kəşfiyyat və müşahidə vasitələri olmadan onlar daha böyük riskə məruz qalacaq və təhdidləri aşkarlama bacarıqları azalacaq", - Barri deyib.
NATO-nun həmçinin özünün "E-3 Awacs" erkən xəbərdarlıq və müşahidə təyyarələri və yanacaq doldurma təyyarələri var ki, Avropa hərbçiləri bunları Ukraynada uzunmüddətli və ya genişmiqyaslı missiyalar üçün əldə etmək istəyir.
NATO-nun komanda və nəzarət strukturları və digər aktivləri NATO ilə əlaqəsi olmayan missiyalarda, o cümlədən Avropa İttifaqı tərəfindən həyata keçirilən missiyalarda istifadə edilə bilər. Lakin bunun üçün Alyansın üzvlərinin yekdil təsdiqi lazımdır.
Ukraynada sülhməramlılar - xəbərlər
"The Washington Post" nəşrinin verdiyi məlumata görə, Avropa ölkələri yaxın həftələrdə Ukraynaya hərbi qrup göndərməyi planlaşdırır ki, sülhməramlı qüvvələrin lazım olan sayı və yerləşdiriləcəyi yerlər müəyyənləşdirilsin. Onlar həmçinin Ukrayna ilə gələcək cəbhə xəttini qorumaq üçün orduyu gücləndirmək məsələsində məsləhətləşmələr aparacaq.
Eyni zamanda, "The Wall Street Journal" yazır ki, Böyük Britaniya və Fransanın Ukraynada sülhməramlılar planı ABŞ-ın dəstəyi olmadan baş tutmayacaq. Bildirilir ki, Paris və London ABŞ-dan aydın təhlükəsizlik zəmanətləri olmadan "qərarlılar koalisiyasını" genişləndirməyə çalışır.
