Alimlər işığa məruz qaldıqda sümüyü sağaldan material hazırlayıblar. Travma və ya infeksiya kimi səbəblərdən sümükdə böyük bir boşluq açıldıqda, boşluq bədənin başqa bir yerindən alınan sümük toxuması ilə doldurulur.
Hafta.az-ın “New Atlas”a istinadən yazdığına görə, lakin bu çətin və ağrılı proses olduğundan elm adamları müxtəlif müalicə üsulları axtarırlar. Bu sahədə görkəmli üsullardan biri sınıq yerinə sümüyə bənzər məsaməli materialların əlavə edilməsidir. Bu materiallar zamanla əriyir və sümük toxumasındakı hüceyrələrin çoxalmasına imkan verir. Ancaq onları bədənə yapışdırmaq üçün istifadə olunan yapışdırıcılar həmişə istənilən nəticəni vermir.
Bəzi alimlər maddəni gelə çevirərək zədələnmiş yerə yeridirlər. Ancaq bu vəziyyətdə material kifayət qədər güclü deyil və ya tamamilə həll olunmur.
Cənubi Koreyanın Pohang Elm və Texnologiya Universitetinin tədqiqatçıları tərəfindən hazırlanan yeni material bu problemləri həll edə bilər.
Alimlər yosunlarda algin turşusundan istifadə edərək hidrogel hazırlayıblar. “Biomaterials” jurnalında dərc olunan məqaləyə görə, bu gel sümük zədələnmiş bölgəyə yeridilir. Daha sonra ona görünən işıq saçıldıqda, materialdakı polimer zəncirləri bir-birinə bağlanaraq möhkəm və məsaməli bərk materiala çevrilir. Bu bərk material daha sonra yaxınlıqdakı sümük toxuması ilə qarşılıqlı əlaqədə olur və sağalmanı təmin edir.
Tədqiqatçılar bildirirlər ki, bu maddə digər sümük hüceyrələrinin yığılma və çoxalma sürətini artırır. Zamanla bu maddə öz yerini əsl sümüyə verir.
Alimlər siçanlar üzərində apardıqları təcrübələrdə istədikləri nəticəni əldə etdiklərini bildirirlər.
İnsan sınaqlarının nə vaxt başlayacağı bəlli deyil, lakin yeni texnologiya ağır sümük zədəsi olan insanlara daha rahat müalicə prosesinə sahib ola bilər.
Araşdırmaya rəhbərlik edən professor Hyung Jun Ça deyir: "Sümük bərpası üçün tədqiqat komandamız tərəfindən hazırlanmış inyeksiya edilə bilən hidrojel sistemi sümük xəstəlikləri üçün ənənəvi kompleks müalicələrə innovativ alternativ təklif edir və sümük toxumasının bərpası texnologiyasını əhəmiyyətli dərəcədə inkişaf etdirir".
