Azərbaycan Premyer Liqasında mübarizə aparan “Kəpəz”in uzun müddətdir zədəli olan futbolçusu Elmir Tağıyev məşqlərə başlayıb.
Arena.az xəbər verir ki, bu barədə Gəncə klubunun mətbuat xidməti məlumat yayıb.
Xəbərdə bildirilir ki, noyabrda İstanbulda əməliyyat olunmuş yarımmüdafiəçi hələlik fərdi hazırlıq keçir. Klubun tibb xidmətinin məlumatına görə, Elmir Tağıyev yanvarın sonunda kollektiv məşqlərə qoşula biləcək.
Xatırladaq ki, “Kəpəz” yanvarın 4-dən etibarən hazırlığa başlayıb. Komanda üzvləri klubun Məşq Mərkəzində bir araya gəliblər. “Sarı-göylər” çempionatın ikinci hissəsi üçün hazırlığı Gəncədə keçirəcəklər. Yanvarın 9-da isə Azər Bağırovun çalışdırdığı komandanı “Qarabağ”la yoxlama oyunu gözləyir. Bakıdakı “Azərsun Arena”da baş tutacaq bu oyuna saat 14:00-da start veriləcək.
