Madrid “Real”ının baş məşqçisi Karlo Ançelotti İspaniya Super Kubokunun final matçından gözləntilərini açıqlayıb.
Arena.az xatırladır ki, paytaxt təmsilçisi İspaniya Super Kubokunun yarmfinalında “Malyorka”nı 3:0 hesabı ilə məğlub edərək, finala yüksəlib.
“Real” finalda əzəli rəqibi “Barselona” ilə qarşılaşacaq. “Kral klubu”nun baş məşqçisi Karlo Ançelotti qarşıdakı “el klasiko” ilə bağlı fikrini paylaşıb:
“Son vaxtlar “el klasiko” həmişə gözlənilməz olub. Asanlıqla qalib gəldiyimiz oyunlar da olub, bizim darmadağın edildiklərimiz də. Finalın necə olacağını təsəvvür etmək çətindir, amma bu, maraqlı olacaq, çünki meydanda çoxlu istedadlar olacaqlar. Hər şeyin necə olacağını bilmirəm. Çalışacağıq ki, “Barselona”nı üstələyək” – “Real”ın rəsmi saytı italyan mütəxəssisdən sitat gətirir.
İspaniya Super Kubokunun finalında “Real” – “Barselona” oyunu yanvarın 12-də keçiriləcək. Hakim oyunu Bakı vaxtı ilə saat 23:00-da başladacaq.
