Masallıda narkotiklərin qanunsuz dövriyyəsini təşkil edən keçmiş məhkum saxlanılıb.
Xezerxeber.az-ın məlumatına görə, Masallı Rayon Polis Şöbəsinin əməkdaşları narkotik vasitələrin qanunsuz dövriyyəsinə qarşı növbəti əməliyyat həyata keçiriblər.
Tədbirlərlə əvvəllər də eyni əmələ görə məhkum olunmuş 38 yaşlı Eldar Ağayev saxlanılıb. Onun üzərindən və istifadəsiz tikilidə gizlətdiyi yerdən 6 kiloqram marixuana aşkarlanıb.
Faktla bağlı cinayət işi başlanılıb, Eldar Ağayev barəsində həbs qətimkan tədbiri seçilib. Araşdırma aparılır.
Şəmkir sakinindən isə 7 kiloqram narkotik vasitə aşkarlanıb.
Rayon polis şöbəsinin əməkdaşlarının həyata keçirdikləri əməliyyat-axtarış tədbirləri nəticəsində narkotiklərin qanunsuz dövriyyəsində şübhəli bilinən Rövşən Əliyev saxlanılıb. Onun üzərindən və evindən 7 kiloqram narkotik vasitə olan marixuana aşkarlanıb. Faktla bağlı cinayət işi başlanılıb.
Hacıqabulda da polis 4 kiloqram narkotik vasitəni dövriyyədən çıxardıb.
Rayon polis şöbəsinin əməkdaşları tərəfindən keçirilən əməliyyat nəticəsində sosial şəbəkələrdə tanış olduğu İran vətəndaşından satış məqsədi ilə narkotik vasitələr əldə edən Salyan rayon sakini Rəşadət Əzizov saxlanılıb.
DİN-in mətbuat xidmətinin Şirvan regional qrupundan verilən məlumata görə, adıçəkilən şəxsdən ümumilikdə 4 kiloqram metamfetamin, heroin, tiryək və marixuana aşkarlanaraq götürülüb.
Faktla bağlı cinayət işi başlanılıb, saxlanılan şəxs barəsində həbs qətimkan tədbiri seçilib.
Şirvanda isə narkotiklərin satışı ilə məşğul olan şəxs saxlanılıb.
Şəhər polis şöbəsinin əməkdaşları tərəfindən keçirilən tədbir zamanı narkotik vasitələrin qanunsuz dövriyyəsini təşkil edən əvvəllər də analoji cinayətlərə görə məhkum olunmuş Samir Əzizov saxlanılıb.
DİN-in mətbuat xidmətinin Şirvan regional qrupundan verilən məlumata görə, həmin şəxsdən satış məqsədi ilə əldə etdiyi külli miqdarda heroin, metamfetamin və marixuana aşkar edilib.
Faktla bağlı cinayət işi başlanılıb, Samir Əzizov barəsində məhkəmənin qərarı ilə həbs qətimkan təbiri seçilib.
Xezerxeber.az mövzu ilə bağlı daha ətraflı videomaterialı təqdim edir.
