Millimizin kapitanı komandasının qələbəsində pay sahibi oldu

Qadın voleybolçulardan ibarət Azərbaycan millisinin üzvü Ayşən Abduləzimova Macarıstan çempionatında növbəti oyununu keçirib. "Rekord.az" xəbər verir ki, təcrübəli blokçumuzun şərəfini qoruduğu "Vasas Obuda" 12-ci turda "KNRC" klubu ilə üz-üzə gəlib. 

Rəqib meydanın baş tutan görüş voleybolçumuzun komandasının üstünlüyü il keçib. Ayşən və rəfiqələri 3 hussə davam edən matçda meydan sahiblərini quru hesabla məğlub ediblər - 3:0 (25:15, 25:18, 25:19). 

Komandasının çətinlik çəkmədiyi qarşılaşmada yığmamızın və "Vasas Obuda"nın kapitanı 10 dəfə fərqlənib. Abduləzimova bu xallardan 7-ni hücumda, 3-nü isə blokda qazanıb.

Qeyd edək ki, məğlubiyyətsizlik seriyasını davam etdirən "Vasas Obuda" 35 xalla turnir cədvəlinə başçılıq edir.