Gənc boksçular arasında Azərbaycan birinciliyinin açılış mərasimi keçirilib.
Azərbaycan Boks Federasiyasından (ABF) hafta.az-a verilən məlumata görə, tədbir iştirakçı komandaların paradı ilə başlayıb. Ardınca Dövlət Himni səsləndirilib.
Azərbaycan Boks Federasiyasının vitse-prezidenti Vüsal Nəsirli bildirib ki, döyüşlərin gərgin və ədalətli keçəcəyinə inanır: “Bu günün gənc boksçuları ölkə idmanın sabahıdır. Burada özünü göstərəcək boksçuların “Los-Anceles-2028” Yay Olimpiya Oyunlarına yollanmaq şansı da yarana bilər. Bu səbəbdən də hər bir görüş böyük əhəmiyyət kəsb etməlidir”.
V.Nəsirli ötən il gənc boksçularımızın uğurlu çıxış etdiklərini, Avropa birinciliyində 2 qızıl, dünya birinciliyində 2 gümüş və 3 bürünc medalla yeni rekordlar vurduqlarını xatırladıb. O, bu uğurların ardının gələcəyinə də inam ifadə edib: “Sizin Azərbaycanı beynəlxalq yarışlarda layiqincə təmsil etməyiniz üçün dövlətimiz tərəfindən vacib olan hər bir şərait yaradılıb, maddi-texniki baza gücləndirilir. Qələbələri sıralamaq üçün səylə çalışmalı, məşqlərdə, yarışlarda özünüzü yaxşı tərəfdən göstərməlisiz. Çempionluq yolunda hər birinizə uğurlar arzulayıram”.
Gənclər və İdman Nazirliyinin olimpiya və paralimpiya idman növləri sektorunun müdiri Aydın Məmmədov isə birinciliyin əhəmiyyətindən danışıb, yarış iştirakçılarına uğurlar arzulayıb.
Sonra birincilik açıq elan olunub.
Boks Mərkəzində keçirilən yarışda oğlanlarda 13, qızlarda 2 çəki dərəcəsi üzrə mükafatçılar müəyyənləşəcək. Həmçinin qızlar arasında ABF-nin seçmə turniri çərçivəsində 6 çəkidə ən güclülər dəqiqləşəcək. Birinciliyə respublikanın müxtəlif şəhər və rayonlarının klublarını, həmçinin idman cəmiyyətlərini təmsil edən 64 komandanın 304 boksçusu qatılıb. Döyüşləri yerli hakimlərlə yanaşı, xarici referilər də idarə edilər.
Yarışda qaliblərin adına yanvarın 19-da aydınlıq gələcək.
