Gürcüstan parlamentinin sədri Şalva Papuaşvili parlamentdə müvəqqəti istintaq komissiyasının yaradılması ilə bağlı çıxışında Rasa Yukneviçiene, Radek Sikorski və Mixeil Saakaşvilinin digər tərəfdarlarını hansı cinayətkar rejimi dəstəklədiklərini və Gürcüstana hansı kriminal rejimi qaytarmaq istədiklərini birbaşa efirdə izləməyə və dinləməyə çağırıb.
Yenicag.az xəbər verir ki, bu barədə o, yerli media ilə söhbətində bildirib.
Papuaşvilinin sözlərinə görə, “Gürcü Arzusu” partiyasının siyasi təşəbbüsü 2003-cü ildən bəri “Milli Hərəkat”ın fəaliyyəti ilə bağlı olacaq. İstintaq komissiyası “Milli Hərəkat” rejiminin qurulmasından etibarən medianın ələ keçirilməsi, biznesin mənimsənilməsi, insanların işgəncəyə məruz qalması və digər sistemli cinayətləri araşdıracaq.
Papuaşvilinin fikrincə, bu araşdırma Saakaşvilini modernləşdirici və demokratiya tərəfdarı kimi təqdim edən bəzi xarici şəxslərin, o cümlədən Polşanın keçmiş xarici işlər naziri Sikorskinin bir neçə ay əvvəl səsləndirdiyi fikirlərin həqiqətə uyğun olmadığını göstərməyi hədəfləyir.
Parlamentin spikeri bildirib ki, bütün proseslər birbaşa efirdə yayımlanacaq və bu, həm gürcü xalqına, həm də Saakaşvili tərəfdarlarına həmin dövrün cinayətkar rejiminin mahiyyətini anlamaq imkanı yaradacaq. O, həmçinin qeyd edib ki, cinayət işləri ilə bağlı məsuliyyət prokurorluğa aid olsa da, parlament məsələyə siyasi qiymət verəcək. Eyni zamanda, bu qiymətləndirmə zamanı cinayət əməllərinin də ortaya çıxacağı istisna edilmir.
O, prokurorluğun məsələni diqqətlə araşdırmalı və cinayət tərkibli əməllərin təsdiqləndiyi halda müvafiq istintaq tədbirləri görməli olduğunu vurğulayıb.
