AMB 3,5 mln manatdan az məcmu kapitalı olan bank olduğunu bildirib

Azərbaycanın 44 bankından 4-nün məcmu kapitalı 2012-ci il iyunun yekunu üçün minimal tələb olan 10 mln manatdan az olub.

Mərkəzi Bankın məlumatına görə, hesabat ayında iki bankın məcmu kapitalı 5-10 mln manat, onların bank sisteminin ümumi kapitallaşmasında payı 0,8% olub. Bir bankın kapitalı 3,5-5 mln manat arasında olub. Son 22 ayda AMB ilk dəfə ölkədə 3,5 mln manatdan az kapitallı bank olduğunu bildirib.

Məcmu kapitalı 10 mln manatdan çox olan bankların sayı iyunda 2 vahid azalaraq 40-a düşüb. Ümumi kapitalda onların payı 99% təşkil edib.

2007-ci ilin iyulundan bankların məcmu kapitalına minimal tələb 10 mln manatdır.

AMB-nin bu yaxınlarda qəbul etdiyi qərara əsasən, 1 yanvar 2014-cü ildən bu göstərici 50 mln manat olacaq. --15B--