Qazaxıstan xarici vətəndaşların ölkədə ola biləcəyi bank kartlarından istifadə müddətini 12 aya qədər məhdudlaşdırıb.
Hafta.az-ın yazdığına görə, bu tənzimləmə Qazaxıstanın Maliyyə Bazarının Tənzimlənməsi və İnkişafı Agentliyi tərəfindən təqdim edilib. Səlahiyyətlilər bildiriblər ki, bu addım bank xidmətlərinin qeyri-qanuni fəaliyyətlərdə, xüsusən də narkotik ticarəti və rəqəmsal aktivlərlə bağlı əməliyyatlarda istifadə riskini azaltmaq məqsədi daşıyır.
Yeni reqlamentə əsasən, sahibkarlar, diplomatlar və investorlar üçün verilən kartlar bu məhdudiyyətdən azaddır. Bundan əlavə, bir şəxsin ola biləcəyi kartların sayı beşə endirilib və bu kartlardan maksimum ikisi kredit kartı ola bilər.
Əvvəllər bu limit on kart olaraq müəyyən edilmişdi. Uşaqlara verilən əlavə kartlar və kredit borclarını ödəmək üçün istifadə edilən kartlar bu limitə daxil edilməyəcək.
Qazaxıstan 2023-cü ilin oktyabrında nerezidentlər üçün kart qaydalarını sərtləşdirməyi planlaşdırırdı. O zaman təklif edilirdi ki, sakinlərdən bank kartı almaq üçün müvəqqəti və ya daimi yaşamaq üçün icazə tələb olunacaq.
Bundan başqa, ödəniş təşkilatlarının minimum kapital tələblərinin 5 dəfə artırılması da gündəmdə olub.
Bildirilir ki, bu qaydalar maliyyə sektorunda daha çox şəffaflığın təmin edilməsi və qanunsuz fəaliyyətin qarşısının alınması məqsədi daşıyır.
